លោក​នាយករដ្ឋមន្រ្តី​ថៃ ប្រាយុទ្ធ ចាន់អូចា បាន​អះអាង​ថា លោក​រីករាយ​ក្នុងការ​ឱ្យបុគ្គល​ដែលប្រសើរ​ជាងលោក មកកាន់​តំណែង​ជំនួស​លោក ដោយលោក​ថា​លោក​ហត់នឿយណាស់​ក្នុងការ​ប្រើសិទ្ធិ​អំណាច។

លោក​បាន​បញ្ជាក់កាល​ពីថ្ងៃទី៥ ខែវិច្ឆិកា ឆ្នាំ​២០២០ ក្នុង​ពិធីមួយ​នៅមហាវិទ្យាល័យការពារជាតិថៃ យ៉ាងដូច្នេះថា៖ «ប្រសិន​បើក្នុងពេល​ខាងមុខ មាន​មនុស្សដែល​ប្រសើរ មាន​ប្រសិទ្ធភាព និង​ស្មោះត្រង់​ជាងខ្ញុំ រូបគេ​នោះនឹង​បន្តការងារ​ពីខ្ញុំ ហើយ​ទទួលខុសត្រូវ​លើ​ជោគវាសនា​របស់​ប្រទេស»។

យ៉ាងណាមិញ លោកបន្តថា៖ «ប៉ុន្តែ​នៅក្នុងពេល​កាន់អំណាច គឺ​មិនមែន​ជារឿង​លេងសើចទេ។ ខ្ញុំបានប្រើ​អំណាច​យ៉ាងច្រើន​ នៅពេល​ខ្ញុំជាមេបញ្ជាការ​ជើងគោក អស់​រយៈពេល ៤ឆ្នាំ»។

លោកប្រាយុទ្ធ លើកឡើង​ថា លោក​ប្រើអំណាច​ដើម្បី​ការពារ​មនុស្សល្អ និងដាក់ទោសលើ​អ្នកប្រព្រឹត្តអាក្រក់។ ការប្រើប្រាស់​អំណាច​ពីរនេះ គឺ​លំបាករួចហើយ។

«មនុស្ស​ជាច្រើន ចោទខ្ញុំថាប្រើអំណាចខុសច្បាប់ ខ្ញុំ​មិនដឹងថា ខ្ញុំខុសច្បាប់ត្រង់ណាទេ។ ខ្ញុំ​តែងតែធ្វើអ្វីៗស្របតាមច្បាប់ទាំងអស់»៕