ឡាវ នឹង​ទិញ​វ៉ាក់សាំង​បង្ការ​ជំងឺ​កូវីដ១៩ តាមរយៈស្ថាប័ន COVAX ហើយ​គ្រោង​ចាក់ឱ្យ​ប្រជាជន​ខ្លួន នៅពាក់កណ្តាលឆ្នាំ​២០២១ខាងមុខ។ នេះបើតាមការចុះផ្សាយ​របស់​សារព័ត៌មាន​ឡាវ Vientiane Times នៅថ្ងៃទី២៣ ខែធ្នូ ឆ្នាំ​២០២០។

ក្នុងសន្និសីទកាសែតក្រោយកិច្ចប្រជុំមួយ​កាលពីថ្ងៃ២២ ខែធ្នូ លោកនាយករដ្ឋមន្រ្តី ថងលូន ស៊ីស៊ូលីត បាន​ថ្លែងថា វ៉ាក់សាំងកូវីដ១៩ នឹងត្រូវផ្តល់ឱ្យ​ដោយ​ប្រទេស​ជាមិត្ត និង​អង្គការអន្តរជាតិ។ ជាមួយគ្នានោះ លោក​បាន​បញ្ជាឱ្យត្រៀមថវិកា​សម្រាប់ទិញ​វ៉ាក់សាំងបន្ថែមទៀត ដើម្បីឱ្យប្រជាជន​ឡាវ បាន​ទទួលចាក់គ្រប់គ្នា។

គិត​មកត្រឹមព្រឹកថ្ងៃទី២៣ធ្នូ ឡាវមានករណីឆ្លងកូវីដ១៩​សរុប ៤១នាក់ ក្នុងនោះ​ជាសះស្បើយ ៣៧នាក់។

គួររំលឹកដែរថា សម្រាប់កម្ពុជា សម្តេច​នាយករដ្ឋមន្រ្តី ហ៊ុន សែន បាន​បញ្ជាក់​កាលពី​សប្តាហ៍មុន​ថា កម្ពុជា​នឹង​ទិញ​វ៉ាក់សាំង​កូវីដ១៩ ដែល​ទទួលស្គាល់​ដោយ​អង្គការសុខភាពពិភពលោក ក្នុងនោះ​គឺ​ទិញវ៉ាក់សាំងតាមរយៈស្ថាប័ន COVAX។

យ៉ាងណាមិញ COVAX អាចផ្តល់វ៉ាក់សាំងឱ្យប្រទេស​នីមួយៗតែ ២០%ប៉ុណ្ណោះ​នៃប្រជាជនសរុប​ក្នុងប្រទេសនោះ ហើយ​តម្រូវឱ្យមានថវិកា​បដិភាគ ៥%៕