គ្រូពេទ្យ​ជួរមុខ​មួយចំនួននៃប្រទេសឡាវ ត្រូវបានចាក់វ៉ាក់សាំង​បង្ការជំងឺកូវីដ១៩​រួចហើយដែល​វ៉ាក់សាំងនេះ​ជារបស់ក្រុមហ៊ុនចិន Sinopharm ដោយបានផ្តល់ជូនឡាវ ២ពាន់ដូស។ នេះបើតាមការបញ្ជាក់​របស់​លោក Bounkong Syhavong រដ្ឋមន្រ្តីក្រសួងសុខាភិបាល​ឡាវ កាលពីថ្ងៃទី៣១ ខែ​ធ្នូ ឆ្នាំ​២០២០។

លោក​អះអាងថា ការចាក់វ៉ាក់សាំងនេះ បាន​បង្ហាញនូវលទ្ធផលល្អ និង​មិនមាន​នរណាម្នាក់​រងផលប៉ះពាល់​សុខភាព​នៅឡើយទេ។ យ៉ាងណាមិញ វ៉ាក់សាំងរបស់ក្រុមហ៊ុនចិននេះ ក៏ត្រូវការចាក់ ២ដងផងដែរ។

បើតាម​រដ្ឋមន្រ្តីខាងលើ​ វ៉ាក់សាំងនេះ នឹង​បង្កើតប្រព័ន្ធសុំា​ប្រឆាំងនឹង​វីរុសកូវីដ១៩ រយៈពេល ៣ឆ្នាំ ហើយ​អាចរក្សាទុក​ក្នុងកម្រិតសីតុណ្ហភាព ២ ទៅ ៨អង្សារសេ ពោលគឺ​អាចរក្សាទុកក្នុងទូរទឹកកកធម្មតាបាន។ «ចិន​បាន​ចាក់វ៉ាក់សាំងឱ្យប្រជាជនខ្លួនរាប់លាននាក់ទៅហើយ ចេញជាលទ្ធផលល្អទៀតផង»។

សូមជម្រាប​ដែរថា ក្រៅពីវ៉ាក់សាំងចិន ឡាវ​ក៏ទើបតែទទួលបាន​វ៉ាក់សាំងរុស្ស៊ី Sputnik V កាលពីថ្ងៃទី២ មករា ឆ្នាំ​២០២១។ ឡាវ​ក៏រំពឹងថា នឹង​ទទួលបាន​វ៉ាក់សាំងកូវីដ១៩​បន្ថែម​ទៀតពី​ស្ថាប័ន COVAX ផងដែរ៕