ប៉ុន្មាន​នាទី​ប៉ុណ្ណោះបន្ទាប់ពី​អាជ្ញាធរ​សុខាភិបាល​ប្រេស៊ីល អនុញ្ញាតឱ្យប្រើប្រាស់​វ៉ាក់សាំង​បង្ការជំងឺកូវីដ១៩ បន្ទាន់​របស់​ក្រុមហ៊ុនចិន Sinovac Biotech និង​ក្រុមហ៊ុនអង់គ្លេស AstraZeneca ប្រទេសនេះ​ក៏ចាប់ផ្តើម​ដំណើរការកម្មវិធីចាក់វ៉ាក់សាំងទាំងពីរនេះ​ភ្លាមៗតែម្តង​នៅថ្ងៃទី១៧ ខែមករា ឆ្នាំ​២០២១។

អ្នក​ទទួលចាក់វ៉ាក់សាំងចិនមុនគេ​ក្នុងប្រទេស​ប្រេស៊ីល គឺ​ជាគ្រូពេទ្យម្នាក់ឈ្មោះ Monica Calazans អាយុ៥៤ឆ្នាំ។

ការ​សម្រេច​ឱ្យប្រើវ៉ាក់សាំងក្រុមហ៊ុន Sinovac នេះ ត្រូវបានធ្វើឡើងបើទោះបីជា​ការចាក់សាកល្បង​របស់​វ៉ាក់សាំងនេះ ក្នុងដំណាក់កាលទី៣ ដែល​ជាដំណាក់កាលចុងក្រោយ​ក្នុងប្រទេសប្រេស៊ីល បង្ហាញ​ប្រសិទ្ធភាព​ត្រឹមតែ ៥០,៤ភាគរយក៏ដោយ។

គួរដឹងថា ប្រេស៊ីល​មានចំនួនករណីឆ្លងកូវីដ១៩ច្រើនជាងគេ​លំដាប់ទី៣ ដែលមានចំនួនជាង ៨,៤៨លាននាក់ ក្នុងនោះស្លាប់ជាង ២០,៩ម៉ឺននាក់ និងជាសះស្បើយ ជាង ៧,៤១លាននាក់ គិតត្រឹមព្រឹកថ្ងៃទី១៨មករានេះ៕