យោងតាម​លទ្ធផល​នៃការធ្វើជំរឿន​ទូទៅ​ប្រជាជន​កម្ពុជាឆ្នាំ២០១៩ បង្ហាញថា រាជធានីភ្នំពេញ មាន​ប្រជាជន​ច្រើនជាងគេ​ប្រមាណជាង ២,២៨លាននាក់ តាមពីក្រោយដោយ​ខេត្តកណ្តាលជាង ១,២លាននាក់, ព្រៃវែង​ជាង ១,០៥លាននាក់ និងសៀមរាបជាង ១,០១លាននាក់។

ចំណែក​ខេត្ត​ដែលមានប្រជាជន​តិចជាងគេបំផុត​គឺខេត្តកែប ដែលមាន​ប្រជាជន​ត្រឹមតែជាង ៤,២៦ម៉ឺននាក់ ខណៈខេត្តមានប្រជាជនតិចជាងគេបន្ទាប់គឺ ប៉ៃលិន ចំនួនជាង ៧,៥១ម៉ឺននាក់ និងមណ្ឌលគិរី ជាង ៩,២២ម៉ឺននាក់។

សូមជម្រាប​ថា ក្នុងឆ្នាំ២០១៩ ​ប្រជាជន​កម្ពុជាមានចំនួនសរុប ១៥ ៥៥២ ២២១នាក់ (ជាង ១៥,៥៥លាននាក់) ក្នុងនោះ​ប្រុស​ចំនួន ៧ ៥៧១ ៨៣៧នាក់ (៤៨,៧%) និងស្រីចំនួន ៧ ៩៨០ ៣៧៤នាក់ (៥១,៣%)។ ​បើប្រៀបធៀបនឹង​ជំរឿន​ឆ្នាំ២០០៨ ដែលមានចំនួនប្រជាជនសរុប ១៣,៤លាននាក់ គឺ​ជំរឿនឆ្នាំ ២០១៩ មាន​ចំនួន​ប្រជាជន​កើនឡើង ២,២លាននាក់៕