សម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បាន​ជំរុញឱ្យ​មានការស្រាវជ្រាវលើករណីមូលហេតុ​គ្រោះថ្នាក់ចរាចរណ៍ ដើម្បីចេញវិធានការជាក់ស្តែង និង​មាន​ប្រសិទ្ធភាព​​ក្នុងការកាត់បន្ថយ​គ្រោះថ្នាក់នេះ។ ក្នុងនោះ​សម្តេចក៏បានលើកឡើង​ពីកង្វះខាត​នៃគំនូស​សញ្ញាចរាចរណ៍ និងផ្លាកសញ្ញាចរាចរណ៍ផងដែរ ដែល​បណ្តាលឱ្យ​គ្រោះថ្នាក់​ដល់ការធ្វើដំណើររបស់​ប្រជាពលរដ្ឋ។

ក្នុងទិវាអន្តរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី១៥ នៅខេត្តកណ្ដាល នាព្រឹក​ថ្ងៃទី០២ ខែកុម្ភៈ ឆ្នាំ២០២១ សម្តេចក្រឡាហោម​បាន​លើកឡើងយ៉ាងដូច្នេះថា៖ «**ពេលថ្ងៃយើងរឹតបន្តឹងការពាក់មួកសុវត្ថិភាពតាមរយៈនគរបាល​ឈរយាមតាមផ្លូវ។ ប៉ុន្តែពេលយប់យើងមិនមានមធ្យមបាយ​គ្រប់គ្រាន់ដើម្បី​ត្រួតពិនិត្យទេ។ អ៊ីចឹងតើយើងត្រូវរកមធ្យោបាយអី? ការអប់រំ ការពន្យល់ជារឿងមួយហើយ**»។

សម្តេច​បន្តថា៖ «តាមលំដាប់លំដោយនៃភាគរយគ្រោះថ្នាក់។ ភាគរយណាខ្ពស់ជាងគេ ត្រូវយកមកគិត ថាដោះស្រាយយ៉ាងម៉េច។ ឧទាហរណ៍ថា បើកបរមិនប្រកាន់ស្តាំ ថា ៦០% ដូច្នេះត្រូវយក ៦០%ហ្នឹង មកដោះស្រាយ។ មិនពាក់មួកសុវត្ថិភាព ៧០ ឬ ៨០% យកអាហ្នឹងមកដោះស្រាយ»។

សម្តេច ស ខេង បន្ថែមថា៖ «ថាគំនូសផ្លូវចុះ ឥឡូវយើងអត់ទាន់មានគំនូសផ្លូវគ្រប់គ្រាន់ ដល់កន្លែងគ្រោះថ្នាក់ កន្លែងអត់មានគំនូស​ផ្លូវគ្រប់គ្រាន់នោះ ដល់ចឹងថាគាត់មិនប្រកាន់ស្តាំ ក៏វាពិបាកដែរ មិនដឹងយកស្អីទៅវាស់ ពីព្រោះយើងអត់មានគំនូស។ យើងថាយកទ្រូងផ្លូវ មិនដឹងកន្លែងទ្រូងផ្លូវ។ យើងថាឱ្យគាត់បន្ថយល្បឿន បន្ថយល្បឿនយ៉ាងម៉េចបើអត់មានផ្លាកសញ្ញាប្រាប់គេផង»៕