អ្នកជំនាញ​នៃក្រុមការងារចិន​ដែលកំពុងប្រតិបត្តិការ​នៅការដ្ឋានសាងសង់​អាកាសយានដ្ឋាន​អន្តរជាតិ​សៀមរាប-អង្គរ បានឲ្យដឹងថា តាម​ផែនការសម្រាប់ឆ្នាំ២០២១នេះ ការសាងសង់​គម្រោងទាំងមូលគ្រោងនឹងសម្រេចឲ្យបានប្រមាណជា៦៧%។ ក្នុងនោះ ការសាងសង់ស្ថានីយអ្នកដំណើរគ្រោងនឹងសម្រេចឲ្យបាន៧៨% ការកសាងតំបន់ហោះហើរគ្រោងនឹងសម្រេចឲ្យបាន៤៥% និង សំណង់ហេដ្ឋារចនាសម្ព័ន្ធទូទៅរបស់អាកាសយាដ្ឋានគ្រោងនឹងសម្រេចឲ្យបាន៥០% ។

អាកាសយានដ្ឋានអន្តរជាតិសៀមរាប-អង្គរ ដែល​មានចម្ងាយ៥១គីឡូម៉ែត្រពីក្រុងសៀមរាបនេះ គ្រោងនឹងពន្លឿនការសាងសង់ ដើម្បីអាច​បញ្ចប់ការសាងសង់នៅ​ពាក់កណ្តាលខែមីនា ឆ្នាំ២០២៣ខាងមុខ។

អ្នកជំនាញចិនរូបនោះ ការឲ្យដឹងយ៉ាងដូច្នេះទៅកាន់ប្រតិភូរដ្ឋបាលខេត្តសៀមរាប ដែលដឹកនាំដោយ​អភិបាលខេត្តសៀមរាប​ លោក ទៀ សីហា កាលពីថ្ងៃទី៦ ខែកុម្ភៈ ឆ្នាំ​២០២១។

ការដ្ឋានសាងសង់ស្ថានីយ៍អ្នកដំណើរដែលចាប់ផ្តើមដំណើរការនាពាក់កណ្តាលខែមីនា មកដល់ចុងឆ្នាំ២០២០ គឺសម្រេចបាន១៥%។ ជាមួយនេះសំណង់តំបន់ហោះហើរដែលចាប់ផ្តើមការដ្ឋាន នាពាក់កណ្តាលខែតុលា មកដល់ចុងឆ្នាំ២០២០ដូចគ្នា សម្រេចបានប្រមាណជា១០%។ ក្នុងនោះដែរក៏ធានាបានថា ការហោះហើរនិងចុះចត មិនមានផលអវិជ្ជមាននៃប្រតិបត្តិការរបស់អាកាសយានដ្ឋាន ចំពោះប្រាសាទអង្គវត្ត និងសំណង់ស្ថាបត្យកម្មជុំវិញនោះឡើយ ម៉្យាងទៀត ការសាងសង់អាកាសយានដ្ឋាននេះ ក៏រក្សានូវបរិស្ថានធម្មជាតិទៀតផង ។

ការសាងសង់អាកាសយានដ្ឋានអន្តរជាតិថ្មីនៅខេត្តសៀមរាបនេះ គ្រោងនឹងបញ្ចប់ ដោយឆ្លងកាត់ការត្រួតពិនិត្យរបស់ក្រុមបច្ចេកទេសនិងអង្គភាពជំនាញ ឈានទៅបំពេញលក្ខខណ្ឌប្រតិបត្តិការរបស់អាកាសយានដ្ឋាន នាពាក់កណ្តាលខែមីនា ឆ្នាំ២០២៣ គឺមានរយៈពេលសរុប៣៦ខែ៕

ប្រភព៖ រដ្ឋបាលខេត្តសៀមរាប