លោក ចូ បៃឌិន ប្រធានាធិបតី​អាមេរិក បាន​ពិភាក្សាគ្នា​ជាមួយ​ប្រធានាធិបតី​ចិន លោក ស៊ី ជិនពីង ដោយផ្ទាល់​តាមទូរសព្ទ​ជាលើកដំបូង​កាលពីថ្ងៃទី១០ ខែកុម្ភៈ ឆ្នាំ​២០២១ ក្រោយ​ចូលកាន់តំណែង​កាលពីខែមុន។

ក្នុង​កិច្ចសន្ទនានោះ លោក បៃឌិន បាន​លើកឡើង​អំពី​ការបង្ក្រាបបាតុកម្មនៅហុងកុង ការបំពាន​សិទ្ធិមនុស្ស​នៅខេត្ត​ស៊ីនជាំង និង​សកម្មភាព​បំពាន​តៃវ៉ាន់ពីសំណាក​អាជ្ញាធរចិន។ ប៉ុន្តែលោក​ ស៊ី ជិនពីង បាន​ឆ្លើយតបវិញថា រឿងទាំងអស់​នេះ គឺជា «កិច្ចការផ្ទៃក្នុងរបស់​ប្រទេសចិន» ហើយ​អាមេរិក​គួរ​តែគោរព​ផលប្រយោជន៍របស់ចិន និង​ធ្វើសកម្មភាព​ដោយប្រុងប្រយ័ត្ន។

លោក ស៊ី ជិនពីង បាន​ប្រាប់​លោក បៃឌិន ទៀតថា ការប្រឈមមុខដាក់​គ្នារវាងចិន និងអាមេរិក បាន​ត្រឹមតែបង្កគ្រោះថ្នាក់​ដល់​ប្រទេសទាំងពីរតែប៉ុណ្ណោះ ពោលគឺ​កិច្ចសហប្រតិបត្តិការ​ជាជម្រើសតែមួយគត់។

ទន្ទឹមនឹង​នេះ លោក ចូ បៃឌិន ក៏បាន​បញ្ជាក់វិញដែរថា អាទិភាព​របស់លោកគឺការពារ​សន្តិសុខ​ វិបុលភាព សុខភាព និង​ជីវភាពរស់នៅរបស់​ប្រជាជនអាមេរិក ព្រមទាំង​ការការពារ​សេរី និងបើកចំហរ​តំបន់​ឥណ្ឌូ-ប៉ាស៊ីហ្វិក៕