ចិន បាន​ផ្តួលអាមេរិក​ ក្នុងការ​ក្លាយ​ជា​ដៃគូពាណិជ្ជកម្ម​ដ៏ធំបំផុត​របស់​សហភាព​អឺរ៉ុប ក្នុងឆ្នាំ​២០២០ ដែល​ជាឆ្នាំពោរពេញ​ដោយ​ជំងឺរាតត្បាត​ជំងឺកូវីដ១៩។

​ពាណិជ្ជកម្ម​រវាងចិន និង EU មានតម្លៃ​ប្រមាណ ៧០៩ពាន់លានដុល្លារកាលពីឆ្នាំ​មុន ពោលគឺ​ធំជាងពាណិជ្ជកម្មរវាង អាមេរិក និង EU ដែល​មាន​តម្លៃត្រឹម ៦៧១ពាន់លានដុល្លារ។

បើទោះបីជា​សេដ្ឋកិច្ច ជួប​ការធ្លាក់ចុះ​នៅត្រីមាសទីមួយ នៃឆ្នាំ​២០២០ ដោយសារការបិទប្រទេស​ទប់ស្កាត់កូវីដ១៩ ប៉ុន្តែសេដ្ឋកិច្ចនេះ​បានល្អប្រសើរឡើងវិញនៅចុងឆ្នាំ និងមានកំណើនល្អជាងគេ​ក្នុងលោក ហើយថែមទាំងបានឆ្លើយតបតាមតម្រូវការ​របស់ EU។

ការនាំចេញ​ខ្លាំង​បំផុត​របស់ចិន ទៅអឺរ៉ុប កាលពីឆ្នាំមុន គឺ​ជាគ្រឿងបរិក្ខារពេទ្យ និង​អេឡិចត្រូនិច ដោយ​សារអឺរ៉ុបជួប​វិបត្តិខ្វះខាតខ្លាំងពេលផ្ទុះកូវីដ១៩។

យោងតាមការិយាល័យស្ថិតិអឺរ៉ុប Eurostat ឱ្យដឹងថា៖ «នៅក្នុងឆ្នាំ​២០២០ ចិន​គឺជាដៃគូដ៏សំខាន់​សម្រាប់ EU។ លទ្ធផលនេះ​គឺដោយសារ​តែកំណើន​នៃការនាំចូល (+៥,៦%) និង​នាំចេញ (+២,២%)»។

យ៉ាងណាមិញ តួលេខខាងលើនេះ​ក៏មិនខុសពីទិន្នន័យ​របស់​ចិន ដែល​បាន​ចេញផ្សាយកាលពីខែមុនបង្ហាញ​ថា ពាណិជ្ជកម្មរវាង ចិន និង EU កើនឡើង ៥,៣% ស្មើនឹងទឹកប្រាក់ ៦៩៦,៤ពាន់លានដុល្លារ ក្នុងឆ្នាំ​២០២០៕