យុវតី Kyal Sin អាយុ១៩ឆ្នាំ ដែល​ត្រូវបាន​ចាត់ទុកជាវីរនារី​ក្នុងការក្រោកឈរធ្វើបាតុកម្មប្រឆាំង​នឹង​រដ្ឋាភិបាលយោធាមីយ៉ាន់ម៉ា បានទទួល​មរណភាព​ក្រោយត្រូវប៉ូលិសបាញ់ត្រូវក្បាល ក្នុងការតវ៉ាមួយនៅក្រុង Mandalay កាលពីថ្ងៃទី៣ ខែមីនា ឆ្នាំ​២០២១។

ក្នុងខ្សែអាត់វីដេអូដែលថតជាប់រូបនាង​ពេលធ្វើបាតុកម្មនោះ គេសង្កេតឃើញ​នាងពាក់អាវយឺតខ្មៅនិងមានអក្សរអង់គ្លេសថា «Everything will be OK»។ ក្នុងវីដេអូគេបានលឺសំឡេងនាង​ស្រែកថា «យើងមិនរត់ទេ» ហើយភ្លាមនោះ ស្រាប់តែមានគ្រាប់កាំភ្លើងបាញ់ចំត្រូវក្បាលរបស់នាងតែម្តង។

ពិធីបញ្ចុះសព​របស់នាង​ត្រូវបានធ្វើឡើង​នៅថ្ងៃទី៤ ខែមីនា ឆ្នាំ​២០២១ ដោយមានអ្នកចូលរួមរាប់រយនាក់។ អ្នកចូលរួម​ភាគច្រើន​ដែលសុទ្ធតែវ័យក្មេង បាន​លើកម្រាមដៃ៣ និង​ស្រែកច្រៀងព្រមគ្នា​ប្រឆាំងនឹង​រដ្ឋប្រហារយោធា ដែលបណ្តាលឱ្យប្រទេស​ធ្លាក់ចូលភាពចលាចល។

Kyal Sin ស្ថិតនៅក្នុងចំណោម​មនុស្ស៣៨នាក់ ដែល​ត្រូវបានសមត្ថកិច្ចមីយ៉ាន់ម៉ា បាញ់សម្លាប់​ក្នុងការតវ៉ានោះ៕