ក្រសួងសុខាភិបាលតួកគី បាន​បញ្ជាក់​នូវ​ប្រសិទ្ធភាព​របស់​វ៉ាក់សាំងចិន Sinovac ដែលក្រុមមនុស្ស​បាន​ចាក់វ៉ាក់សាំងនេះ គឺមានករណីឆ្លងកូវីដ១៩ថ្មីធ្លាក់ចុះ។

គិតត្រឹម​ថ្ងៃទី១៦ ខែមេសា ឆ្នាំ​២០២១ តួកគី​បាន​ចាក់វ៉ាក់សាំង​ Sinovac គ្រប់​២ដូស​ដល់មនុស្ស​ប្រមាណ ៧,៥លាននាក់ និង១ដូស ដល់​ជាង ១១,៩លាននាក់។

ក្រសួង​បានសិក្សាឃើញ​ពីប្រសិទ្ធភាព​នៃការចាក់វ៉ាក់សាំងនេះ​ថា អត្រាឆ្លងថ្មី​នៃក្រុមមនុស្សអាយុចាប់ពី ៦៥ឆ្នាំឡើង គឺមានការធ្លាក់ចុះពី ១៧,៧% មកនៅត្រឹម ៨,២% ចំណែក​ក្រុមគ្រូពេទ្យ គឺមាន​ករណីឆ្លងថ្មីធ្លាក់ចុះពី ៥,៣% មកនៅត្រឹម ១,៣%។ អត្រាអ្នកឆ្លងដែល​ត្រូវបញ្ជូនទៅមន្ទីរពេទ្យ​ធ្លាក់ចុះពី ៥៧,៤% មកនៅត្រឹម៣១%។

លោក Fahrettin Koca រដ្ឋមន្រ្តី​សុខាភិបាល​តួកគី ថ្លែងថា ការចាក់វ៉ាក់សាំង​បានផ្តល់​នូវ​ផលប្រយោជន៍ដ៏សំខាន់​ចំពោះ​ការកាត់បន្ថយ​ករណីឆ្លង និងករណីបញ្ជូនទៅមន្ទីរពេទ្យ ហើយ​លោក​បានជំរុញឱ្យ​ពលរដ្ឋ​ទៅទទួល​ការចាក់វ៉ាក់សាំងនេះ។

គួរដឹងថា ក្នុងការចាក់សាកល្បង​ដំណាក់កាលទីបី ក្នុងប្រទេសតួកគី​កាលពីខែមីនា​កន្លងទៅ ឱ្យដឹងថា វ៉ាក់សាំង Sinovac មានប្រសិទ្ធភាព​ ៨៣,៥% និងទប់ស្កាត់​មិនឱ្យមានភាពធ្ងន់ធ្ងរ ១០០%៕