មកស្គាល់បុណ្យធំៗចំនួន៦ ដែលប្រមូលផ្ដុំមនុស្សច្រើនបំផុតនៅឥណ្ឌា

2021-05-03 00:47:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ឥណ្ឌាជាប់ចំណាត់ថ្នាក់លេខ២នៅលើពិភពលោក ដែលជាប្រទេសសម្បូរមនុស្សរស់នៅច្រើនជាងបំផុតបន្ទាប់ពីប្រទេសចិន។ បច្ចុប្បន្ន ប្រជាជនឥណ្ឌាមានចំនួនសរុបប្រមាណជាង ១៣៧៦លាននាក់ឯណោះ ស្មើនឹង ១៧,៥% នៃមនុស្សសរុបលើផែនដី។ ហេតុតែមានគ្នាច្រើន ឥណ្ឌាក៏សម្បូរទៅដោយការគោរពប្រតិបត្តិសាសនាផ្សេងៗខុសៗគ្នាទៅតាមហ្នឹងដែរ។

តាមការសង្កេត នៅឥណ្ឌាមានពិធីបុណ្យធំៗចំនួន៦ ដែលមានសភាពលេចធ្លោ និងធំដុំជាងគេ ដែលតែងប្រារព្ធជារៀងរាល់ឆ្នាំ ដូចខាងក្រោម៖

១. ពិធីបុណ្យ Holi

Holi គឺជាពិធីបុណ្យពណ៌នៅឥណ្ឌា ដែលធ្វើឡើងប្រចាំឆ្នាំនៅអំឡុងខែមីនា។ ពិធីបុណ្យនេះប្រារព្ធឡើងនៅជុំវិញរូបសំណាកបិសាច Holika ដែលត្រូវបានបំផ្លាញ និងដុតឲ្យឆេះ សម្រាប់ធ្វើជាការបូជាថ្វាយដល់ព្រះវិស្ណុ។ ផ្នែកដែលមានភាពសប្បាយជាងគេនៃពិធី Holi គឺជាការបាចម្សៅពណ៌ និងបាញ់កាំភ្លើងទឹកដាក់គ្នា។

២. ពិធីបុណ្យ Ganesh

បុណ្យនេះធ្វើឡើងដើម្បីជាការគោរពដល់ព្រះគណេស Ganesha ហើយវាមានរយៈពេលចំនួន ១១ថ្ងៃ។ ជាទូទៅ ពិធីសាសនាមួយនេះច្រើនតែធ្វើឡើងចន្លោះខែសីហា និងខែកញ្ញា ជារៀងរាល់ឆ្នាំ។ មានការដង្ហែរូបសំណាកព្រះគណេសនៅតាមដងផ្លូវ និងដាក់តាំងនៅក្នុងផ្ទះ ហើយនៅថ្ងៃចុងបញ្ចប់នៃពិធី រូបសំណាកទាំងនោះត្រូវបានយកទៅពន្លិចចោលនៅក្នុងទឹកសមុទ្រ។

៣. ពិធីបុណ្យ Navaratri

បុណ្យ Navaratri មានរយៈពេល៩យប់ ១០ថ្ងៃ ជាប់ៗគ្នា (ចន្លោះពីខែកញ្ញា និងខែតុលា)។ វាជាការរំលឹកដល់ទេពធីតា Durga ហើយនៅថ្ងៃទី១០ ប្រារព្ធឡើងដើម្បីសាទរការបង្ក្រាបបិសាច Ravan បានដោយព្រះរាម និងហនុមាន។

៤. ពិធីបុណ្យ Diwali

ពិធីនេះជាការសាទរចំពោះភាពជោគជ័យនៃអំពើល្អទៅលើអំពើអាក្រក់ និងភាពភ្លឺទៅលើភាពងងឹត ដែលទាក់ទងនឹងទេវកថាពីរឿងដែលព្រះរាម និងមហេសីនាង សីតា អាចវិលត្រឡប់ទៅព្រះនគរនៅ Ayodhya វិញ ក្រោយយកឈ្នះស្ដេចបិសាច Ravan។ ពិធីបុណ្យ Diwali មានរយៈពេល៥ថ្ងៃ ហើយធ្វើឡើងនៅចន្លោះខែវិច្ឆិកា រាល់ឆ្នាំ។

៥. ពិធីបុណ្យ Onam

នៅក្នុងពិធីបុណ្យ Onam មានការរៀបចំជាផ្កា និងម្ហូបអាហារដាក់លើស្លឹកចេកនៅតាមផ្ទះរៀងៗខ្លួន ហើយប្រជាជនវិញស្លៀកពាក់ខោអាវថ្មីៗ រាំច្រៀង និងលេងល្បែងប្រពៃណីជាច្រើន។ ពិធីនេះពេញនិយមបំផុតសម្រាប់ប្រជាជនឥណ្ឌានៅភាគខាងត្បូង ជាពិសេសនៅរដ្ឋ Kerala។ ការប្រារព្ធពិធីនេះជាការកិច្ចស្វាគមន៍ស្ដេច Mahabali នៃទេវកថាឥណ្ឌា។ Onam ច្រើនតែប្រារព្ធនៅអំឡុងខែសីហា។

៦. ពិធីបុណ្យ Krishna Janmashtami ឬហៅថា Govinda

ពិធីនេះជាការរំលឹកចំពោះថ្ងៃប្រសូត្រនៃព្រះគ្រឹស្នា ដែលប្រារព្ធនៅចន្លោះខែសីហា ឬខែកញ្ញា ជាប្រចាំឆ្នាំ។ នៅក្នុងពិធី មានការប្រមូលផ្ដុំមនុស្សជាច្រើនឡើងជាន់គ្នាបង្កើតជាពីរ៉ាមីតដ៏ខ្ពស់មួយ ដើម្បីចាប់ និងបំបែកក្អមដី៕