រដ្ឋាភិបាល​ឥណ្ឌា បាន​អះអាងថា​ ករណីឆ្លងកូវីដ១៩ បាន​នឹង​កំពុងធ្លាក់ចុះវិញហើយ ពោលគឺ​បាន​ធ្លាក់ចុះ​តាំងពីថ្ងៃទី៣០មេសា ដែលមានករណីឆ្លងជាង ៤០ម៉ឺននាក់ ចុះ​ជាបន្តបន្ទាប់​មកនៅត្រឹមជាង ៣៥ម៉ឺននាក់ នៅថ្ងៃទី៣ឧសភា។

មន្រ្តី​សុខាភិបាល​ឥណ្ឌា​បញ្ជាក់​ថា រដ្ឋដេលី គឺស្ថិតក្នុងចំណោមរដ្ឋមួយចំនួន ដែលមានករណីឆ្លងកូវីដ១៩​ធ្លាក់ចុះ។ ករណីឆ្លង​ក៏បាន​ធ្លាក់ចុះផងដែរ នៅ​រដ្ឋដែល​រងផលប៉ះពាល់​ខ្លាំងដូចជា Maharashtra, Punjab និង Uttar Pradesh។

យ៉ាងណាមិញ បើតាម​អ្នកជំនាញ​អះអាងថា ការខ្វះខាត​នូវការធ្វើតេស្តយកសំណាកអ្នកជំងឺ និងការស្លាប់​របស់​អ្នកជំងឺនៅផ្ទះ ដែល​គ្រូពេទ្យមិនបានដឹង គឺ​អាច​បញ្ជាក់ថា អត្រាឆ្លង និង​ស្លាប់ គឺនៅតែច្រើនជាង​តួលេខ​ក្នុងរបាយការណ៍។

ឥណ្ឌា មានករណីឆ្លងកូវីដ១៩សរុប ជាង ២០,២៧លាននាក់ ក្នុងនោះស្លាប់ជាង ២២,២៣ម៉ឺននាក់ និងជាសះស្បើយ​ជាង ១៦,៦លាននាក់ គិតត្រឹមថ្ងៃចន្ទម្សិលមិញ៕