ការ​ដឹកជញ្ជូន​វ៉ាក់សាំង​ Johnson & Johnson ជាង១លានដូស​ទៅកាន់​ប្រទេសឡាវដែល​គ្រោងនឹង​ទៅដល់នៅថ្ងៃទី១៥ កក្កដា ២០២១ គឺត្រូវបានពន្យារពេល​ ដោយសារតែយន្តហោះមានបញ្ហា​ម៉ាស៊ីន។ នេះបើតាមការប្រកាស​របស់​ស្ថានទូតអាមេរិក ប្រចាំក្រុងវៀងចន្ទន៍។

យ៉ាងណាមិញ ពេល​វេលា​ដឹកជញ្ជូនវ៉ាក់សាំង​ទៅឡាវម្តងទៀត មិន​ទាន់​ត្រូវបាន​បញ្ជាក់នៅឡើយ ប៉ុន្តែរំពឹងថា នឹង​ឆាប់ៗតាម​ដែលអាចធ្វើបាន។

ស្ថានទូត​អាមេរិក​បានសរសេរលើទំព័រហ្វេសប៊ុកថា៖ «ដោយសារតែបញ្ហាទាំងនេះ យើងមិនមានការបញ្ជាក់​ថ្មី​នៃការ​មកដល់នៃវ៉ាក់សាំងនទេ ប៉ុន្តែសូមកុំបារម្ភ ក្រុមហ៊ុនអាកាសចរណ៍បានធានាចំពោះយើងថា បញ្ហា​ម៉ាស៊ីនយន្តហោះនេះ កំពុងត្រូវបានជួសជុល ហើយវ៉ាក់សាំង​មិនមានការខូចខាតទេ»។

សូមជម្រាប​ថា រដ្ឋាភិបាល​អាមេរិក បាន​បរិច្ចាគ​វ៉ាក់សាំង Johnson & Johnson ចំនួន ១លាន ៨ពាន់ដូស ឱ្យឡាវ តាមរយៈកម្មវិធីកូវ៉ាក់។ ការបរិច្ចាគនេះ គឺដើម្បីជួយឱ្យឡាវ​ អាចសម្រេច​ផែនការ​ចាក់វ៉ាក់សាំងបាន ៥០% នៃប្រជាជនរបស់ខ្លួន ត្រឹមចុងឆ្នាំ២០២១នេះ៕