ឥណ្ឌា បានបញ្ចេញ​នាវាផ្ទុកយន្តហោះ​របស់ខ្លួនជាលើកដំបូង ដោយ​បាន​ធ្វើការសាកល្បង​បើកបរ​នៅលើសមុទ្រ កាលពីថ្ងៃទី៤ ខែសីហា ឆ្នាំ​២០២១ ដែល​ធ្វើឱ្យ​កងទ័ពជើងទឹក​ឥណ្ឌា កាន់តែខ្លាំងឡើង​ ចូលក្នុងចំណោម​ប្រទេសមហាអំណាច​​ដែលមាននាវាប្រភេទនេះ។

នាវានេះ​ត្រូវបាន​ដាក់ឈ្មោះថា INS Vikrant គ្រោងនឹង​ដាក់ឱ្យដំណើរការជាផ្លូវការ​នៅខែសីហា ឆ្នាំ២០២២។ វាមានទម្ងន់ ៤ម៉ឺនតោន បណ្តោយ ២៦២ម៉ែត្រ ទទឹង ៦២ម៉ែត្រ និងកម្ពស់ ៥៩ម៉ែត្រ។

កងទ័ពជើងទឹក បាន​ចេញ​សេចក្តីថ្លែងការណ៍បញ្ជាក់ថា ការសាកល្បងនាវានេះ គឺដើម្បីអបអរខួប​៥០ឆ្នាំ​ នៃជ័យជម្នះ​ក្នុងសង្គ្រាមឆ្នាំ១៩៧១។ វា​ជាថ្ងៃមោទនភាព និង​ប្រវត្តិសាស្រ្ត​របស់​ឥណ្ឌា។ នេះជា​នាវា​ដ៏ធំបំផុត​ដែលត្រូវបាន​រចនាឡើង និងសាងសង់​ក្នុងប្រទេស​ឥណ្ឌា និង​ជាសមិទ្ធផល​ដ៏សំខាន់មួយ​៕