នាយករដ្ឋមន្រ្តី​សិង្ហបុរី លោក លី ស៊ានឡុង បាន​និយាយចំៗទៅកាន់លោកស្រី កាម៉ាឡា ហារីស អនុប្រធានាធិបតីអាមេរិកថា ពិភពលោកនឹងរង់ចាំ​មើល​ជំហាន​បន្ទាប់​របស់​អាមេរិក ក្រោយដកទ័ពចេញពីអាហ្វហ្គានីស្ថាន។ លោក​ថ្លែងដូច្នេះ ក្នុងសន្និសីទកាសែតរួមគ្នា កាលពីថ្ងៃទី២៣ ខែសីហា ឆ្នាំ​២០២១។

លោក​បានលើកឡើង​ថា កាយវិការ​របស់​អាមេរិក​ចុងក្រោយ​នេះ គឺ​ជាការបង្ហាញ​ពីការតាំងចិត្ត ដំណោះស្រាយ និង​គោលជំហររបស់​​អាមេរិក​មកលើមិត្តភក្តិ និង​សម្ព័ន្ធមិត្ត​នៅក្នុងតំបន់ និងការប្រយុទ្ធប្រឆាំងអំពើភេរវកម្ម ថាតើ​អាមេរិក​នឹងមាន​ឥទ្ធិពល​យ៉ាងណាខ្លះទៀត។

លោក​ លី ស៊ានឡុង លើកឡើង​ដូច្នេះថា៖ «ប្រទេស​នានា បានគិតគូរ និង​កែប្រែគោលជំហរតាមកាលៈទេសៈ។ ពេលខ្លះវា​ក៏ដំណើរការដោយរលូន ប៉ុន្តែពេលខ្លះក៏​ជួបឧបសគ្គ»។

យ៉ាងណាមិញ លោក​សង្ឃឹមថា អាហ្វហ្គានីស្ថាន នឹងមិនក្លាយជាចំណុច​កណ្តាល​នៃអំពើភេរវកម្ម​ម្តងទៀតឡើយ៕