ប្រធានាធិបតី​បារាំង លោក អេម៉ានូអែល ម៉ាក្រុង នឹង​និយាយ​គ្នាផ្ទាល់​ជាមួយ​ប្រធានាធិបតីអាមេរិក លោក ចូ បៃឌិន ក្នុងប៉ុន្មានថ្ងៃខាងមុខនេះ ដោយសារតែប្រទេសទាំងពីរ មានភាពប្រេះឆាការទូតគ្នាយ៉ាងធ្ងន់ធ្ងរ ជុំវិញរឿងនាវាមុជទឹក​ដែល​អាមេរិក ប្រកាស​ជួយ​អូស្ត្រាលី។

អ្នកនាំពាក្យ​រដ្ឋាភិបាល​បារាំង លោក Gabriel Attal បានបញ្ជាក់​ថា គម្រោងជជែកគ្នាតាមទូរសព្ទនេះ គឺជាការស្នើសុំរបស់​លោក បៃឌិន។ លោកបន្ថែម​ថា ភាគី​បារាំង គឺពេលដំបូងនោះមានការភ្ញាក់ផ្អើល និងខឹងយ៉ាងខ្លាំង ប៉ុន្តែពេលនេះ ជាពេល​ដែលត្រូវបោះជំហានទៅមុខទៀត។

លោក ម៉ាក្រុង នឹង​ស្វែងរកការពន្យល់របស់លោក ​បៃឌិន អំពី​អ្វី​ដែល​នាំ​ឱ្យ​មានការ​បាត់បង់ទំនុកចិត្ត​ដ៏ធំ​បែបនេះ។

គួររំលឹក​ថា កាលពីថ្ងៃពុធសប្តាហ៍មុន ក្នុងកិច្ចប្រជុំមួយរវាងមេដឹកនាំកំពូល​អាមេរិក អង់គ្លេស និងអូស្ត្រាលី គឺ​លោក បៃឌិន បាន​ប្រកាស​ជួយអូស្ត្រាលីឱ្យទទួលបាន​នាវាមុជទឹក​ដើរដោយថាមពលនុយក្លេអ៊ែរ ដែល​ជាផ្នែកមួយ​ជួយដល់សម្ព័ន្ធមិត្ត​យុទ្ធសាស្រ្ត​ឥណ្ឌូ-ប៉ាស៊ីហ្វិក។ ប៉ុន្តែទង្វើបែបនេះ បានធ្វើឱ្យអូស្ត្រាលី​ត្រូវបញ្ចប់កុងត្រា ទិញ​នាវាមុជទឹកពីបារាំង ១២គ្រឿង តម្លៃ ៦៦ពាន់លានដុល្លារ ដែលធ្វើឡើងកាលពីឆ្នាំ២០១៦។

ក្រោយការ​ប្រកាស​នេះ បារាំង​បាន​សម្រេច​ហៅ​អគ្គរដ្ឋទូតរបស់ខ្លួន​ដែលប្រចាំអាមេរិក និងអូស្ត្រាលី ឱ្យត្រលប់មកវិញ៕