លោក ឡាម៉ូ ចែករំលែកបទពិសោធន៍ថតរូបជាង ១០ឆ្នាំដើម្បីទេសចរណ៍នៅកម្ពុជា រហូតឈ្នះពានរង្វាន់ជាច្រើន

2021-12-30 03:46:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងសប្ដាហ៍ថ្មីនេះពីកម្មវិធី Starting Up ជួបជាមួយភ្ញៀវកិត្តិយសពិសេសមួយរូបគឺលោក លី មិន (ឡាម៉ូ) ដែលជាអ្នកថតរូបទេសចរណ៍ដ៏ល្បីនៅកម្ពុជា កំពុងទទួលបានជោគជ័យមានអ្នកគាំទ្រជាច្រើទៅលើស្នាដៃថតរូបរបស់លោក។ ដែលលោក ឡាម៉ូ នឹងមកបង្ហាញពីបទពិសោធន៍នៃការថតរូប រួមទាំងដំណើរថតរូបផ្ដិតយកទិដ្ឋភាពនៅប្រទេសកម្ពុជាជាច្រើនបង្ហាញទៅដល់អ្នកគ្រប់គ្នា។

លោក ឡាម៉ូ កើតនៅឆ្នាំ ១៩៧៧ ឃុំកំពង់ក្តី ស្រុកជីក្រែង ខេត្តសៀមរាបបញ្ចាប់បរិញ្ញាបត្រព័ត៌មានវិទ្យា នៅសាកលវិទ្យាល័យជាតិគ្រប់គ្រងឆ្នាំ ២០០៩។ លោកធ្លាប់បង្កើតអាជីវកម្មតាំងគ្រឿងអលង្ការ និងច្នៃម៉ូតគ្រឿងអលង្ការតែត្រូវបានឈប់សម្រាកហើយ។ លោកបានចាប់ផ្តើមអាជីពចេញថតរូបតាំងពីឆ្នាំ ២០០៩ ដើម្បីផលិតស្នាដៃរូបថតទេសចរណ៍។ ឆ្នាំ២០២១នេះជាឆ្នាំដំបូងចាប់ផ្តើមលក់រូបថតជាង១០០ សន្លឹកតម្លៃចាប់ពីមួយពី ៧៨ ដុល្លារដល់ ៣៦០០ ដុល្លារ (តាមទំហំ)។

ក្នុងអាជីពជាអ្នកថតរូបទេសចរណ៍ដ៏ល្បីរបស់លោកកន្លងមក លោកធ្លាប់បានបញ្ចប់យ៉ាងជោគជ័យគម្រោង «៤៤ថ្ងៃជុំវិញប្រទេសកម្ពុជា» កាលពីដើមឆ្នាំ ២០២១ ដើម្បីលើកស្ទួយវិស័យថតរូបនៅកម្ពុជា ជំរុញវិស័យទេសចរណ៍ក្នុងស្រុក ផ្សព្វផ្សាយវប្បធម៌ ប្រពៃណី សាសនា ជួយជីវភាពសហគមន៍តាមតំបន់នីមួយៗ និងបំណងធំចង់រៀបចងក្រង សៀវភៅរូបភាព «Unseen Cambodia» សម្រាប់ផ្សព្វផ្សាយវិស័យទេសចរណ៍កម្ពុជា។

លោក ឡាម៉ូ ធ្លាប់មានស្នាដៃរូបថតឈ្នះពានរង្វាន់ជយលាភីលេខ១ ពីរឆ្នាំជាប់គ្នា ២០១៧ និង ២០១៨ ក្នុងកម្មវិធី Sony World Photography Awards ប្រចាំកម្ពុជា, ឈ្នះជយលាភីលេខ២ ក្នុងកម្មវិធី លំដាប់អាស៊ី Canon Asia Championship ២០១៨ និងតាំងបង្ហាញជាសាធារណៈក្នុង កម្មវិធីពិព័រណ៌រូបថតដ៏ធំប្រចាំកម្ពុជានៅ Photo Phnom Penh Festival ២០១៨ និងសព្វថ្ងៃជាទូតសុឆន្ទះក្រុមហ៊ុនកាំមេរ៉ា FujiFilm និង Zeiss Lens ។

លោក ឡាម៉ូ បានបង្ហាញពីផលលំបាកមួយចំនួនពីការថតរូបរបស់លោក ដោយទម្រាំផលិតរូបថតស្អាតៗ ត្រូវចូលព្រៃជ្រៅៗជួបសត្វសាហាវៗនឹងត្រូវភ្លៀងខ្យល់ មានជនខិលខួចលួចរូបពីកម្លាំងញើសឈាមខំផលិត យកទៅផ្តិតចេញដោយមិនសុំសិទ្ធសោះ។ តែទោះជាយ៉ាងណាលោកនៅតែទទួលបានការគាំទ្រ និងស្ងើចសសើរពីសំណាក់មហាជននៅទូទាំងប្រទេសរហូតដល់ឆាកអន្តរជាតិផងដែរ។

សូមទស្សនាវីដេអូ ពីអ្នកថតរូបទេសចរណ៍ដ៏ល្បីនៅកម្ពុជារូបនេះ ខាងក្រោម៖