ទើបបានឡើងវគ្គផ្តាច់ព្រ័ត្រ UEL ឥឡូវ Pogba ជួបទុក្ខធំ ឪពុកស្លាប់

2017-05-13 06:18:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Fassou Antoine Pogba ដែលត្រូវជាឪពុកបង្កើតរបស់ខ្សែបម្រើតម្លៃថ្លៃបំផុតលើលោក Paul Pogba បានទទួលមរណភាព កាលពីម្សិលមិញ នៅអាយុ ៧៩ ឆ្នាំ ដោយសារចាស់ជរា។ ការលាចាកលោករបស់ឪពុក Pogba គឺស្របពេលដែលក្លឹបបិសាចក្រហម Manchester United ទើបតែឆ្លងផុតវគ្គពាក់កណ្ដាលផ្តាច់ព្រ័ត្រ ពានរង្វាន់ UEFA Europa League ពេលប្រកួតទល់នឹង Celta Vigo បានប្រហែល ២៤ ម៉ោងប៉ុណ្ណោះ។

លោក Fassou Antoine Pogba មានជំងឺរ៉ាំរ៉ៃជាយូរយារណាស់មកហើយ។ លោកបានចាកចេញពីស្រុកកំណើតនៅប្រទេសហ្គីណេ ក្នុងអាយុ ៣០ឆ្នាំ ដោយផ្លាស់ទីលំនៅទៅកាន់ក្រុងប៉ារីស ប្រទេសបារាំង ដែលជាទីកន្លែងកំណើតរបស់ Paul Pogba។ លោកមានកូនប្រុសពីរនាក់ទៀត គឺ Florentin និង Mathias ដែលជាកូនភ្លោះដែលជ្រើសរើសយកសញ្ជាតិហ្គីណេ ខុសពី Pogba ដែលមានសញ្ជាតិបារាំង។

កាលពីព្រឹត្តិការណ៍ EURO 2016 លោក Fassou ក៏បានទៅចូលរួមទស្សនាការប្រកួតរបស់ Pogba ពេលរូបគេលេងឲ្យក្រុមជម្រើសជាតិបារាំង បានជើងឯករងផងដែរ។

ការចាកចេញរបស់លោក បានបន្សល់ទុក្ខដ៏ក្រៀមក្រំមួយសម្រាប់ Pogba ដែលទើបតែអបអរជ័យជម្នះ ដែលខ្លួនបានជួយក្រុមបិសាចក្រហម ឈានទៅដល់វគ្គផ្តាច់ព្រ័ត្រ ពានរង្វាន់ Europa League ដែលនឹងធ្វើឡើងនាថ្ងៃទី២៥ ខែឧសភាខាងមុខនេះ ទល់នឹងក្រុម Ajax៕

ប្រភព៖ Dailymail ប្រែសម្រួល៖ លាភ.