លោកផៃ ស៊ីផាន ប្រតិកម្មនឹងលោកកឹម សុខា ដែលចង់លុបក្រសួងអភិវឌ្ឍន៍ជនបទ

2017-05-22 08:27:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកផៃ ស៊ីផាន បានប្រតិកម្មភ្លាមៗ តបទៅលោកកឹម សុខា ដែលប្រកាសថានឹងលុបចោលក្រសួងអភិវឌ្ឍន៍ជនបទពេលគណបក្សលោកឈ្នះឆ្នោតដឹកនាំរដ្ឋាភិបាល។

លោកផៃ ស៊ីផាន អ្នកនាំពាក្យរដ្ឋាភិបាល (រូបភាព៖ RFA)

អ្នកនាំពាក្យរាជរដ្ឋាភិបាលរូបនេះ បានលើកឡើងថា សាររបស់លោកកឹម សុខា គឺមានបំណងបំផ្លាញជីវិភាពនៃការរីកចម្រើនដល់ប្រជាកសិករ នៅតាមទីជនបទ។ លោកបន្ថែមថា ការប៉ុនប៉ងរំលាយក្រសួងអភិវឌ្ឍន៍ជនបទ គឺមិនត្រឹមតែបំផ្លាញការអភិវឌ្ឍន៍ តែជាការសងសឹកដល់ប្រជាកសិករតាមជនបទនោះទៅវិញ។ លោកក៏បានចំអកដល់លោកកឹម សុខា ថាគ្មានសមត្ថភាពក្នុងការអភិវឌ្ឍន៍ប្រទេស ដូចជាការអភិវឌ្ឍន៍ជនបទ ដូចគណបក្សប្រជាជនកម្ពុជានោះទេ។

រំលឹកផងដែរថា កាលពីថ្ងៃដំបូងនៃយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំសង្កាត់ លោកកឹម សុខា ប្រធានគណបក្សសង្រ្គោះជាតិ បានលើកឡើងថា បើគណបក្សលោកជាប់ឆ្នោតឡើងកាន់អំណាច នឹងលុបក្រសួងអភិវឌ្ឍន៍ជនបទចោល។ លោកបានលើកហេតុផលថា ពេលគណបក្សលោកឈ្នះឆ្នោត នឹងផ្ដល់ថវិកា ៥០ម៉ឺនដុល្លារសម្រាប់ការអភិវឌ្ឍក្នុងឃុំសង្កាត់នីមួយៗ ដូច្នេះក្រសួងអភិវឌ្ឍន៍ជនបទ លែងសំខាន់ទៀតហើយ ព្រោះឃុំសង្កាត់ អាចប្រើប្រាស់ថវិកានេះ ដើម្បីអភិវឌ្ឍន៍ ដោយមិនចាំបាច់ទៅកាន់ក្រសួងអភិវឌ្ឍន៍ជនបទដូចសព្វថ្ងៃនេះទេ។

លោកកឹម សុខា ក្នុងថ្ងៃឃោសនាដំបូងនៅរាជធានីភ្នំពេញ

កន្លងមក លោកកែម ឡី អ្នកស្រាវជ្រាវសង្គម ធ្លាប់បានលើកឡើងកាលពីលោកនៅមានជីវិតថា ក្រសួងអភិវឌ្ឍន៍ជនបទ ក្រសួងធនធានទឹក និងក្រសួងបរិស្ថាន គួរតែត្រូវបញ្ចូលមកក្នុងក្រសួងកសិកម្ម រុក្ខាប្រមាញ់ និងនេសាទតែមួយ ដើម្បីកាត់បន្ថយការចំណាយថវិកាជាតិ។ លោកថាការបំបែកក្រសួងច្រើននេះ គឺជាការខ្ជះខ្ជាយថវិកាជាតិ ហើយគួរយកថវិកាទាំងនោះទៅអភិវឌ្ឍជនបទវិញ៕

ប្រភព៖ Vayo Fm ប្រែសម្រួល៖ សុខ សុវត្ថិ