វៀតណាម អបអរសាទរការបោះឆ្នោតនៅកម្ពុជា

2017-06-24 23:09:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានសភាវៀតណាម លោកស្រី Nguyen Thi Kim Ngan បានអបអរសាទរកម្ពុជា ដែលបានរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ប្រកបដោយភាពជោគជ័យ។ លោកស្រី លើកឡើងដូច្នេះក្នុងជំនួបជាមួយប្រធានរដ្ឋសភាកម្ពុជា សម្តេច ហេង សំរិន កាលពីថ្ងៃទី២៣មិថុនា។ នេះបើតាមទំព័រ Facebook របស់រដ្ឋសភាជាតិ បានឱ្យដឹងកាលពីម្សិលមិញ។

លោកស្រី Nguyen Thi Kim Ngan អះអាងថា ជោគជ័យនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ គឺជាលទ្ធភាពដ៏សំខាន់មួយ ដែលនាំឱ្យកម្ពុជា ទទួលជោគជ័យទៀតក្នុងការរៀបចំការបោះឆ្នោតថ្នាក់ជាតិនៅឆ្នាំ២០១៨ខាងមុខនេះ។

សម្តេច ហេង សំរិន និងលោកស្រី Nguyen Thi Kim Ngan ក្នុងជំនួបផ្លូវការនៅក្រុងហាណូយ ថ្ងៃទី២៣មិថុនា។ រូបថត៖ Facebook រដ្ឋសភាជាតិ

ក្រៅពីនេះ ប្រធានសភាវៀតណាម ក៏បានអបអរសាទរកម្ពុជា ដែលបានរៀបចំវេទិកាសេដ្ឋកិច្ចពិភពលោកស្តីពីអាស៊ាន កាលពីខែឧសភា បានយ៉ាងជោគជ័យផងដែរ។ លោកស្រីចាត់ទុកថា នេះជាកិត្យានុភាពរបស់កម្ពុជា នៅលើឆាកអន្តរជាតិ និងជាឱកាសល្អមួយ ដែលអាចឱ្យកម្ពុជាទទួលបានការចាប់អារម្មណ៍ពីអ្នកវិនិយោគបរទេសបន្ថែមទៀត។

លោកស្រីក៏បានលើកឡើងពីការបោះបង្គោលព្រំដែន ដែលភាគីទាំង២ សម្រេចបានជាង ៨០% និងរំពឹងថា អាចសម្រេចបានទាំងស្រុងក្នុងពេលឆាប់ៗនេះ។

សូមបញ្ជាក់ថា សម្តេច ហេង សំរិន បានដឹកនាំគណៈប្រតិភូ ធ្វើទស្សនកិច្ចផ្លូវការនៅវៀតណាមពីថ្ងៃទី២៣ ដល់ ២៦មិថុនា ២០១៧ ក្នុងឱកាសខួបលើកទី៥០ នៃទំនាក់ទំនងប្រទេសទាំង២៕

អត្ថបទ៖ សំភី