ខៀវ កាញារិទ្ធ ជម្រុញឲ្យមន្ទីរព័ត៌មាន ដំណើរការទូរទស្សន៍អនឡាញ

2017-07-19 08:55:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្លែងនៅក្នុងពិធីសំណេះសំណាលជាមួយមន្ដ្រីមន្ទីរព័ត៌មានខេត្តសៀមរាបនាព្រឹកថ្ងៃទី១៨ កក្កដា ២០១៧ រដ្ឋមន្ដ្រីក្រសួងព័ត៌មាន លោក ខៀវ កាញារិទ្ធ បានជំរុញឲ្យមន្ទីរព័ត៌មានតាមបណ្ដាខេត្តនៅទូទាំងព្រះរាជាណាចក្រកម្ពុជា រៀបចំដំណើរការទូរទស្សន៍អនឡាញ ក្នុងគោលដៅប្រកួតប្រជែងផ្នែកព័ត៌មានផង និងបង្កើតចំណូលបន្ថែមសម្រាប់មន្ទីរផង។

លោក ខៀវ កាញារិទ្ធិ មានប្រសាសន៍ថា វាជារឿងដ៏សំខាន់ដែលយើងត្រូវជ្រើសរើសយកជម្រើសណាមួយ ដែលមហាជនគាំទ្រ និងងាយស្រួលក្នុងការទស្សនា។ ត្រង់ចំណុចនេះ លោកចង់សំដៅដល់ការបង្កើតទូរទស្សន៍អនឡាញតាមបណ្តាមន្ទីរព័ត៌មាន និងការចាក់ផ្សាយនៅតាមទូរទស្សន៍ខ្សែកាប ដែលជាជម្រើសដ៏ល្អសម្រាប់ប្រជាជនរស់នៅក្នុងទីក្រុង។ ការរៀបចំគម្រោងនេះឡើងទៀតសោតគឺអាចកាត់បន្ថយចំណាយ (ដោយមិនបាច់ចាំមានស្ទូឌីយូ និងដំឡើងអង់តែនជាដើម) និងជាការសាកល្បងការរៀនសូត្រផងដែរ។

លោករដ្ឋមន្រ្តីបញ្ជាក់ថា ក្នុងដំណាក់កាលនេះ ការផ្សាយគួរចាប់ផ្តើមពីការផ្សាយតាមអនឡាញ និងជួលម៉ោងចាក់ផ្សាយតាមទូរទស្សន៍ខ្សែកាប ដែលក្នុងមួយថ្ងៃ ចាប់ពី៤ទៅ៥ម៉ោងសិន។

លោករដ្ឋមន្រ្តីបានបង្ហាញនូវសុទិដ្ឋិនិយមថា គម្រោងរៀបចំឲ្យមានទូរទស្សន៍អនឡាញ នៅតាមបណ្ដាមន្ទីរព័ត៌មានខេត្ត-ក្រុង នឹងទទួលបានជោគជ័យ ហើយវាក៏អាស្រ័យទៅលើឆន្ទៈ និងការច្នៃប្រឌិតរបស់ប្រធានមន្ទីរនីមួយៗផងដែរ។ បច្ចុប្បន្នគម្រោងនេះ បាន និងកំពុងដំណើរការដោយជោគជ័យនៅតាមខេត្តមួយចំនួនរួចហើយ រួមមាន ខេត្តកំពង់ចាម កំពង់ធំ ព្រៃវែង និងខេត្តក្រចេះ៕

អត្ថបទ៖ រស់ សុជាតិ