Moto G5S និង Moto G5S Plus ជា​ស្មាតហ្វូន​ស៊េរី​ថ្មី​កម្រិត​មធ្យម​របស់​ក្រុមហ៊ុន Motorola ដែល​ទើប​ដាក់​បង្ហាញ​នៅ​ថ្ងៃ​នេះ។ ស្មាតហ្វូន​ទាំង​២​ម៉ូដែល គឺ​ជា​កំណែ​ទម្រង់​ថ្មី​បន្ទាប់​ពី Moto G5 និង Moto G5 Plus ដែល​ចេញ​កាល​ពី​ខែ​កុម្ភៈ​កន្លង​ទៅ ហើយ​ជា​ពិសេស​នោះ​ពួក​វា​បាន​ផ្ដោត​សំខាន់​លើ​គុណភាព​កាមេរ៉ា និង​​ការ​កែប្រែ​កំហុស​មួយ​ចំនួន។

Moto G5S មាន​អេក្រង់​ទំហំ ៥,២​អ៊ីញ Full HD និង​បំពាក់​ឈីប Snapdragon 430 ជា​ប្រភេទ octa-core CPU។ ខាង​ក្នុង​ម៉ាស៊ីន មាន​ផ្ទុក​អង្គ​ចងចាំ​ទំហំ 32GB, RAM 3GB និង​ថាមពល​ថ្ម​ទំហំ 3000mAh។ កាមេរ៉ា​ក្រោយ​មាន​ទំហំ 16MP f/2.0 អម​ជាមួយ​ភ្លើង LED មួយ​គ្រាប់​នៅ​ខាង​ក្រោម។ យ៉ាង​ណា​មិញ Moto G5S មិន​អាច​ថត​វីដេអូ​កម្រិត 4K បាន​នោះ​ទេ គឺ​នៅ​ត្រឹមតែ Full HD ប៉ុណ្ណោះ។ តម្លៃ​លក់​ប្រហែល ២៩៤​ដុល្លារ។

ចំណែក​ឯ Moto G5S Plus មាន​អេក្រង់​ទំហំ ៥,៥​អ៊ីញ រួម​នឹង​បន្ទះ​ឈីប Snapdragon 625 អាច​រត់​ក្នុង​ល្បឿន 2.0GHz។ ថាមពល​ថ្ម​របស់​វា​ទំហំ​ប៉ុន​នឹង Moto G5S គឺ 3000mAh។ កាមេរ៉ា​ក្រោយ​មាន​២គ្រាប់ ទំហំ 13MP f/2.0 អាច​ថត​រូបភាព​បាន​ច្បាស់​ល្អ និង​វីដេអូ​កម្រិត 4K។ ខាង​មុខ​វិញ មាន​បំពាក់​កាមេរ៉ា​ទំហំ 8MP f/2.2។ Moto G5S Plus ដាក់​លក់​ក្នុង​តម្លៃ​ប្រមាណ ៣៥០​ដុល្លារ៕