គ្រូ U22 ម៉ាឡេស៊ី ពន្យល់ពីកំហុសអ្នកចាំទី ដែលធ្វើឲ្យចូលទីខ្លួនឯង

2017-08-30 07:00:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Ong Kim Swee គ្រូបង្វឹកក្រុមបាល់ទាត់ជម្រើសជាតិ U22 ម៉ាឡេស៊ី បានសារភាពថា បរាជ័យវគ្គផ្តាច់ព្រ័ត្រដណ្ដើមមេដាយមាសស៊ីហ្គេម ទល់នឹងក្រុមថៃ យប់មិញ បានធ្វើឲ្យក្រុមម្ចាស់ផ្ទះខកចិត្ត និងឈឺចាប់យ៉ាងខ្លាំង។ យ៉ាងណាក៏ដោយ លោកមិនបន្ទោសអ្នកចាំទីរបស់ម៉ាឡេស៊ី ដែលបានយកដៃដាល់បាល់ខុសបច្ចេកទេស ធ្វើឲ្យចូលទីខ្លួនឯង ១គ្រាប់ និងជាគ្រាប់ជ័យជម្នះរបស់ថៃ នោះទេ។

លោកបានបន្តថា អ្នកចាំទី Haziq Nadzli និងសមាជិកដទៃទៀត បានបង្ហាញថា ពួកគេគឺជាទំពាំងដ៏ល្អ ដើម្បីស្នងឫស្សី សម្រាប់ក្រុមជម្រើសជាតិម៉ាឡេស៊ី នៅថ្ងៃអនាគត។ «ពួកយើងបានធ្វើឲ្យថៃមានការលំបាកច្រើនក្នុងការប្រកួតនេះ។ ខ្ញុំកោតសរសើរដល់កីឡាកររបស់ខ្ញុំ ដែលបានលេងដោយអស់ពីសមត្ថភាព។ វាជារឿងដ៏ឈឺចាប់មួយ ដែលបង្កឲ្យកើតមានគ្រាប់បាល់ដូច្នោះ សម្រាប់កីឡាករគ្រប់ៗរូប រួមទាំង Haziq ផងដែរ»។

«ខ្ញុំសង្ឃឹមថា ពួកយើងមិនបង្កការលំបាកដល់ Haziq ដោយចាត់ទុកគេជាមនុស្សអាក្រក់នោះទេ។ គេនៅក្មេង និងមានអនាគតភ្លឺស្វាង»។ នេះជាសម្ដីរបស់គ្រូបង្វឹកម៉ាឡេស៊ីខាងលើ៕