សំ វណ្ណដេត ប្រាប់ពីចំណុចដែលត្រូវប្រុងប្រយ័ត្នខ្ពស់ ពេលប៉ះបឹងកេត

2017-10-14 03:34:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គ្រូបង្វឹកក្រុមព្រះខ័នរាជស្វាយរៀង លោក សំ វណ្ណដេត បានក្រើនរំឭកដល់សមាជិកកូនក្រុមរបស់លោកឲ្យមានការប្រុងប្រយ័ត្នខ្ពស់ ក្នុងការប្រកួតតទល់នឹងក្រុមបឹងកេត ក្នុងសប្ដាហ៍ទី១៧ លីគកំពូលកម្ពុជា នៅកីឡដ្ឋានខេត្តស្វាយរៀង វេលាម៉ោង ៦ល្ងាច ថ្ងៃសៅរ៍ ទី១៤ ខែតុលា ឆ្នាំ២០១៧នេះ។

ក្រុមព្រះខ័នរាជស្វាយរៀង

លោក សំ វណ្ណដេត បានបញ្ជាក់ថា ក្រុមរបស់លោកបានរៀបចំរួចជាស្រេច ដើម្បីប្រកួតជាមួយក្រុមបឹងកេត ដោយមានការសហការគ្នាល្អ និងយកចិត្តទុកដាក់ហ្វឹកហាត់តាមពេលវេលាកំណត់ ទោះបីជាកីឡាករមួយចំនួនជាប់បំពេញការងារជាមួយក្រុមជម្រើសជាតិក៏ដោយ។

លោកឲ្យដឹងថា ព្រះខ័នរាជស្វាយរៀង បានបន្ថែមស្មារតីប្រុងប្រយ័ត្នជានិច្ចទាំងការប្រយុទ្ធ និងការការពារចំពោះបឹងកេត ដែលជាក្រុមពោរពេញដោយបទពិសោធន៍ ទាំងកម្រិតជាតិ និងអន្តរជាតិ។

ក្រុមព្រះខ័នរាជស្វាយរៀង

សូមបញ្ជាក់ថា ការប្រកួតជើងទីមួយ រដូវកាលនេះ ក្រុមទាំងពីរ ទទួលបានត្រឹមលទ្ធផលស្មើគ្នា ២-២ ប៉ុណ្ណោះ។ បច្ចុប្បន្ន ព្រះខ័នរាជស្វាយរៀង កំពុងឈរលើកំពូលតារាង មាន ៣៧ពិន្ទុ ខណៈបឹងកេត ឈរនៅលេខ៤ តាមពីក្រោយព្រះខ័នរាជស្វាយរៀង ៧ពិន្ទុ។

ដោយឡែក គូធំៗចំនួន ២គូទៀត នឹងធ្វើការប្រកួតនៅម៉ោងដំណាលគ្នាផងដែរ គឺ ភ្នំពេញក្រោន Vs ណាហ្គាវើល នៅកីឡដ្ឋាន RSN និង ក្រសួងការពារជាតិ Vs Cambodian Tiger នៅស្តាតចាស់៕

អត្ថបទ៖ លាភ.