ពេជ្រ សោភា បង្ហោះសាររំជួលចិត្ត ៣ ក្រោយអតីតកូនក្រុម សាន ស្រីឡៃ ស្លាប់
- 2017-10-16 23:33:39
- ចំនួនមតិ 0 | ចំនួនចែករំលែក 0
ពេជ្រ សោភា បង្ហោះសាររំជួលចិត្ត ៣ ក្រោយអតីតកូនក្រុម សាន ស្រីឡៃ ស្លាប់
ចន្លោះមិនឃើញ
តារាចម្រៀងល្បីឈ្មោះប្រចាំផលិតកម្មរស្មីហង្សមាស ពេជ្រ សោភា ដែលអតីតគ្រូបង្វឹករបស់សាន ស្រីឡៃ ក្នុងកម្មវិធី The Voice Cambodia រដូវកាលទី២ បានបង្ហាញអារម្មណ៍រន្ធត់ និងចូលរួមរំលែកទុក្ខចំពោះក្រុមក្រុមគ្រួសាររបស់សាន ស្រីឡៃ ក្រោយពីដឹងថា ស្រីឡៃ ត្រូវបានឃាតកបាញ់សម្លាប់កាលពីរសៀលថ្ងៃទី១៦ តុលា។
សារទី១របស់ពេជ្រ សោភា គឺជាសាររំលែកទុក្ខ ចំពោះក្រុមគ្រួសារសព ដែលមានខ្លឹមសារដើមទាំងស្រុងថា៖ "នាងខ្ញុំ ពេជ្រ សោភា សូមចូលរួមរំលែកទុក្ខដល់ក្រុមគ្រួសារ សាន្ត ស្រីឡៃផង សូមវិញាណក្ខន្ធអូនទៅបានសុខ"។
ប៉ុន្មានម៉ោងក្រោយមក ម្ចាស់បទ "អូនទៅហើយ" រូបនេះ បានបង្ហោះវីដេអូបទចម្រៀងមួយបទដែលនាងបកស្រាយជាមួយសាន ស្រីឡៃ មានចំណងជើងថា "រឿងក្នុងចិត្ត" អមជាមួយសារមួយឃ្លាថា៖ "រឿងក្មុងចិត្ត ដែលសាន ស្រីឡៃមិនអាចនិយាយបាន តែងនាងតែងតែប្រាប់ខ្ញុំ ពីរឿងក្នុងចិត្តនាង យើងនៅមិនទាន់បានច្រៀងបទនេះជាមួយគ្នានៅលើឆាកទេ នាងទៅចោលបទចម្រៀងហើយ សុំជាតិក្រោយកុំឲ្យជួបដូចជាតិនេះណា ស្រីឡៃ"។
សារមួយទៀត ដែលអ្នកនាង ពេជ្រ សោភា សរសេរលើទំព័រហ្វេសប៊ុកផ្លូវការរបស់ខ្លួន មានអត្ថន័យថា៖ "នាង (ស្រីឡៃ) ថា ស្រលាញ់ខ្ញុំណាស់ ចង់ច្រៀងជាមួយណាស់ អត់បានលុយក៏ទៅដែរ ឲ្យតែបានច្រៀងជាមួយបង"។
សូមរំលឹកថា នាង សាន ស្រីឡៃ និងស្វាមី បានរៀបការតាំងពីឆ្នាំ២០០៨ មកម្ល៉េះ មកដល់បច្ចុប្បន្ន មានកូន ២នាក់ ដែលម្នាក់អាយុ ៧ឆ្នាំ និងម្នាក់ទៀត អាយុ៤ ឆ្នាំ៕