ចំណុចខ្លះៗ ដើម្បីមើលអាគុយរថយន្តថាជិតខូច ឬមិនសាកភ្លើង

2017-10-18 09:42:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អ៊ុយ សាខន ជាគ្រូបណ្ដុះបណ្ដាលបច្ចេកទេសរថយន្តនៅសាលា JVC បានប្រាប់ឲ្យដឹងថា អាគុយឡានមានពីរប្រភេទ គឺអាគុយស្ងួតនិងអាគុយទឹក។

លោក អ៊ុយ សាខន

ចំពោះអាគុយស្ងួត ពេលមិនកាន់ភ្លើង គេអាចពិនិត្យមើលលើអាគុយ បើមានពណ៌បៃតង មានន័យថា វានៅមានថាមពលអាចនៅប្រើប្រាស់បាន បើឃើញពណ៌ក្រហម នោះវាជិតអស់ថាមពល និងជិតដល់ពេលប្តូរថ្មីហើយ តែបើពណ៌សត្រូវតែប្តូរចេញតែម្តង។

លោកបន្តថា ចំពោះអាគុយទឹកវិញ ពេលណាវាអស់គុណភាពឬខូច អាចមើលឃើញដោយធុងអាគុយរាងប៉ោងមានស្នឹមលើក្បាលអាគុយច្រើន ហើយកម្រិតទឹកអាស៊ីដធ្លាក់ចុះ ឬក៏រីងតែម្ដង និងអាចមានស្នឹមនៅលើក្បាលអាគុយ។ លើសពីនេះ នៅពេលដេរបញ្ឆេះ វាមិនងាយឆេះនោះទេ។ នេះបញ្ជាក់ថាវាជិតខូចហើយ។ ក្រៅពីនេះវាក៏នឹងលោតសញ្ញាបង្ហាញនៅតាបឡូរថយន្តថា អាគុយមានបញ្ហាមិនកាន់ភ្លើង ឬមួយឌីណាម៉ូមិនសាកភ្លើងជាដើម។

ដើម្បីឱ្យកាន់តែច្បាស់ អាចទិញឧបករណ៍ធ្វើតេស្តមកពិនិត្យបន្ថែមក៏បាន។

ចំពោះវិធីងាយៗដើម្បីថែរក្សា លោកប្រាប់ថា គេត្រូវជ្រើសរើសប្រភេទអាគុយឱ្យត្រូវនឹងកម្លាំងម៉ាស៊ីនរថយន្តដែលក្រុមហ៊ុនកំណត់។ ពេលដេរបញ្ឆេះម្ដងជាពីរដងមិនឆេះ គេមិនត្រូវព្យាយាមដេរទៀតនោះទេ ព្រោះវាអាចធ្វើឱ្យអាគុយឆាប់ខូច។

លោកបន្ថែមថា ក្នុង១សប្ដាហ៍ បើមិនចេញដំណើរទៅណា ក៏ត្រូវបញ្ឆេះរថយន្តពី ៣ ទៅ ៥ នាទី ដើម្បីបំពេញថាមពលឡើងវិញ។ ក្រៅពីនេះ ក៏ត្រូវដុសសម្អាតក្រចាប់អាគុយ (លាងសម្អាតជាមួយទឹកក្ដៅ) ឱ្យបានស្អាតកុំឱ្យវាមានស្នឹម ឬច្រែះនៅលើក្បាលអាគុយ៕

អត្ថបទ៖ ម៉េងងី