គ.ជ.ប ប្រកាសថា ការបែងចែកអាសនៈរបស់គណបក្សសង្គ្រោះជាតិ នឹងរួចរាល់មុនថ្ងៃទី២៤វិច្ឆិកា

2017-11-20 10:07:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈកម្មាធិការជាតិរៀបចំការបោះឆ្នោត (គ.ជ.ប) ត្រូវរៀបចំបែងចែកអាសនៈរបស់គណបក្សសង្គ្រោះជាតិ ទៅឲ្យគណបក្សនយោបាយដទៃទៀត ឲ្យបានមុនថ្ងៃទី២៤ ខែវិច្ឆិកា ឆ្នាំ២០១៧។ នេះបើតាមលោក សោម សូរីដា អគ្គលេខាធិការរង គ.ជ.ប បានឲ្យដឹងនៅថ្ងៃទី២០វិច្ឆិកានេះ។

លោក សោម សូរីដា បានបញ្ជាក់ថា យ៉ាងយូរត្រឹមថ្ងៃ ២៤ វិច្ឆិកាខាងមុខ គ.ជ.ប នឹងដំណើរការបែងចែកអាសនៈរបស់គណបក្សសង្គ្រោះជាតិ ដែលត្រូវបានតុលាការកំពូលចេញសាលដីការំលាយកាលពីថ្ងៃទី១៦វិច្ឆិកា។ ការបែងចែកអាសនៈនេះ នឹងធ្វើឡើងតាមច្បាប់បោះឆ្នោត ដែលទើបតែធ្វើវិសោធនកម្ម និងរួមបញ្ចូលទំាងបទបញ្ជា និងនីតិវិធី សម្រាប់ការអនុវត្តមាត្រា ១៣៨ស្ទួន នៃច្បាប់ស្ដីពីវិសោធនកម្មច្បាប់ ស្ដីពីការបោះឆ្នោតជ្រើសតាំងតំណាងរាស្ត្រផងដែរ។

លោក សោម សូរីដា អគ្គលេខាធិការរង គ.ជ.ប

សម្រាប់អាសនៈរបស់គណបក្សសង្គ្រោះជាតិ ទាំង ៥៥រូប នៅរដ្ឋសភា ត្រូវបាន គ.ជ.ប ប្រកាសថា នឹងត្រូវបែងចែកទៅឲ្យគណបក្សនយោបាយចំនួន៦ ដែលក្នុងនោះរួមមាន គណបក្សហ្វុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ គណបក្សខ្មែរដើម្បីអភិវឌ្ឍន៍សេដ្ឋកិច្ច គណបក្សខ្មែរឈប់ក្រ គណបក្សសញ្ជាតិកម្ពុជា និងគណបក្សសាធារណរដ្ឋប្រជាធិបតេយ្យ។

ដោយឡែក គណបក្សប្រជាជនកម្ពុជា បានប្រកាសថា មិនទទួលបានអាសនៈរបស់គណបក្សសង្គ្រោះជាតិ នៅរដ្ឋសភាទេ ខណៈដែលគណបក្សសម្ព័ន្ធប្រជាធិបតេយ្យរបស់លោក ខឹម វាសនា បានប្រកាសបដិសេធ មិនទទួលយកអាសនៈរបស់គណបក្សសង្គ្រោះជាតិ នៅរដ្ឋសភា នៅក្រុមប្រឹក្សារាជធានីខេត្ត ក្រុងស្រុក ខណ្ឌ និងនៅក្រុមប្រឹក្សាឃុំសង្កាត់ នោះឡើយ៕

អត្ថបទ៖ លីហៀង