ពែកមី បង្ហាញក្តីបារម្ភ ក្នុងការបញ្ចាំងរឿង "អ្នកបម្រើ០០៧"

2017-11-23 09:15:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផលិតកម្មថោន បានសម្ពោធភាពយន្តខ្នាតធំរឿង "អ្នកបម្រើ០០៧" ជាស្នាដៃទី១ របស់នាយ ពែកមី កាលពីល្ងាចថ្ងៃទី២២វិច្ឆិកាម្សិលមិញ នៅរោងភាពយន្ត Prime Cineplex ផ្សារទំនើបសុវណ្ណា។ ក្នុងនោះនាយ ពែកមី ជាតួឯកប្រុស អ្នកដឹកនាំសម្ដែង និងនិពន្ធភាពយន្តខាងលើ បានបង្ហាញក្ដីព្រួយបារម្ភខ្លះនៅពេលរឿងមួយនេះដាក់បញ្ចាំងនៅរោងកុន។

ថ្លែងក្នុងពិធីសម្ពោធដាក់បញ្ចាំងជាផ្លូវការរឿង "អ្នកបម្រើ០០៧" នាយ ពែកមី បាននិយាយថា តាមការស្ទាបស្ទង់ពីផលិតករមុនៗ ដែលបានដាក់បញ្ចាំងរឿងនៅក្នុងអំឡុងខែតុលា និងដើមខែ វិច្ឆិកា កន្លងទៅបានឲ្យប្រាប់ឲ្យនាយដឹងថា ចំនួនអ្នកទស្សនាមានការធ្លាក់ចុះបើប្រៀបធៀបជាមួយរឿងមុនៗ។ ហេតុដូច្នេះហើយទើបធ្វើឲ្យលោកមានក្ដីព្រួយបារម្ភខ្លះៗ នៅពេលដាក់បញ្ចាំងស្នាដៃទី១របស់ខ្លួនក្នុងផលិតកម្មថោន ខ្លាចមានអ្នកមកទស្សនាតិច។

ពែកមី ថា៖ «ឥឡូវនេះកុនបរទេសបរទេសចូលមកខ្មែរយើងច្រើន ហើយកុនខ្មែរយើងបើប្រៀបធៀបជាមួយកុនបរទេសនៅមានកម្រិត។ មួយវិញទៀតអាកាសធាតុមិនអំណោយផលដាក់បញ្ចាំងទៅចំពេលភ្លៀងអ្នកទស្សនាគាត់ មិនអាចមកទស្សនាបាន បើពួកគាត់មកមើលរឿងក៏មកបានតិចនាក់ដែរ»។

ទោះបីជាមានការព្រួយបារម្ភខ្លះៗក្ដី ពែកមី នៅតែសង្ឃឹម និងជឿជាក់យ៉ាងមុតមាំថា រឿងរបស់ខ្លួននឹងទទួលបានការគាំទ្រពីទស្សនិកជន ព្រោះរឿង "អ្នកបម្រើ០០៧" ជារឿងមនោសញ្ចេតនាស្នេហាបែបកំប្លែងរវាងអ្នកបម្រើ និងចៅហ្វាយស្រី។

រឿង "អ្នកបម្រើ០០៧" បានចំណាយដើមទុនក្នុងការផលិតអស់ ៥ ម៉ឺនដុល្លារ ជាវណ្ណកម្មទី២ ក្នុងផលិតកម្មថោន បន្ទាប់ពីរឿង "ទឹកចិត្តម្ដាយសម័យថ្មី" ។ រឿងនេះគ្រោងនឹងដាក់បញ្ចាំងគ្រប់រោងភាពយន្តទំនើបៗក្នុងរាជធានី ភ្នំពេញ និងនៅតាមបណ្ដាខេត្តមួយចំនួននៅថ្ងៃទី ២៣ ខែ វិច្ឆិកា ឆ្នាំ ២០១៧ ខាងមុខនេះហើយ៕

សូមទស្សនាវីដេអូ Trailer