LDP កំពុងពិនិត្យមើលផ្លូវច្បាប់ ដើម្បីប្តឹងបកទៅព្រះសង្ឃដែលប្ដឹងលោក ខឹម វាសនា

2017-11-28 06:13:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក កូវ គា អ្នកនាំពាក្យគណបក្សសម្ព័ន្ធដើម្បីប្រជាធិបតេយ្យ (LDP) បានបដិសេធថា ការប្តឹងរបស់ព្រះតេជគុណ ហោ សុខុន និងព្រះតេជគុណ មាស រីណា ទៅលើលោក ខឹម វាសនា គឺជាការមួលបង្កាច់។ លោកបញ្ជាក់ថា LDP កំពុងតែពិនិត្យមើលផ្លូវច្បាប់ ដើម្បីប្តឹងបកវិញ។

លោក កូវ គា អ្នកនាំពាក្យគណបក្សសម្ព័ន្ធដើម្បីប្រជាធិបតេយ្យ

លោកកូវ គា បានថ្លែងប្រាប់ខ្លីៗនៅព្រឹកថ្ងៃទី២៨ វិច្ឆិកានេះថា "គណបក្សសម្ព័ន្ធដើម្បីប្រជាធិបតេយ្យ បង្កើតឡើង ដោយមានការទទួលស្គាល់ពីក្រសួងមហាផ្ទៃ។ ព្រះសង្ឃដែលបានប្តឹងនោះ គឺគ្មានសិទ្ធិចោទប្រកាន់ ឬក៏ដៀលមកលើគណបក្សសម្ព័ន្ធប្រជាធិបតេយ្យទេ។ ការចោទប្រកាន់នេះ គឺរំលោភលើគណបក្សសម្ព័ន្ធដើម្បីប្រជាធិបតេយ្យ និងរំលោភទៅលើដែនសមត្ថកិច្ចរបស់ក្រសួងមហាផ្ទៃ និងរំលោភច្បាប់រដ្ឋធម្មនុញ្ញផងដែរ។ ការចោទប្រកាន់បែបនេះ លុះត្រាតែមានការចោទប្រកាន់ពីក្រសួងមហាផ្ទៃ ឬក៏តុលាការ"។

លោក ខឹម វាសនា ប្រមុខគណបក្សសម្ព័ន្ធដើម្បីប្រជាធិបតេយ្យ ក្នុងថ្ងៃបោះឆ្នោតឃុំសង្កាត់ កាលពីខែមិថុនាកន្លងទៅ

អ្នកនាំពាក្យដដែល បានបន្ថែមទៀតថា "ទាក់ទងករណីនេះ គណបក្សនឹងធ្វើការពិគ្រោះគ្នា ហើយនឹងធ្វើការសម្រេចថាត្រូវប្តឹងបកវិញ ឬយ៉ាងណា។ ក្រុមលោកសង្ឃដែលប្តឹងគណបក្សសម្ព័ន្ធដើម្បីប្រជាធិបតេយ្យ គឺជាក្រុមសង្ឃដដែលៗ”៕

គួរបញ្ជាក់ថា ព្រះតេជគុណ ហោ សុខុន ចៅអធិការវត្តច្បារអំពៅ និងព្រះតេជគុណ មាស រីណា ព្រះគ្រូសូត្រឆ្វេងវត្តសន្តិភាព បានប្ដឹងលោកខឹម វាសនា ប្រមុខគណបក្សសម្ព័ន្ធដើម្បីប្រជាធិបតេយ្យ ទៅនាយកដ្ឋានព្រហ្មទណ្ឌនៃក្រសួងមហាផ្ទៃ កាលពីរសៀលថ្ងៃទី២៧ ខែវិច្ឆិកាម្សិលមិញនេះ។ នៅក្នុងពាក្យបណ្ដឹងនោះ ព្រះសង្ឃទាំងពីរអង្គ បានចោទលោកខឹម វាសនា ជាច្រើនករណី ដូចជាបទសាបព្រោះវប្បធម៌ជេរប្រមាថ ប្រមាថព្រះមហាក្សត្រ ញុះញង់បំបែកបំបាក់ជាតិខ្មែរ ប្រមាថស្ថាប័នព្រះសង្ឃ និងញុះញង់ឲ្យមានបដិវត្តន៍ផ្តួលរំលំរាជរដ្ឋាភិបាលជាដើម៕