លោក ត្រាំ ចង់ទិញកោះមួយដែលធំជាងគេក្នុងពិភពលោក

2019-08-16 06:39:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីសហរដ្ឋអាមេរិក លោក ដូណាល់ ត្រាំ បានលើកឡើងជាច្រើនដងថាលោកចង់ឲ្យអាមេរិកទិញកោះ Greenland ពីប្រទេសដាណឺម៉ាក ហើយបានបង្គាប់ឲ្យមេធាវីសេតវិមានសិក្សាពីលទ្ធភាពនៃការទិញកោះនេះ។

មន្រ្តីសេតវិមានបានប្រាប់សារព័ត៌មាន The Wall Street Journal ថាលោក ត្រាំ បានលើកពីបញ្ហានេះក្នុងកិច្ចប្រជុំ និងពេលអាហារពេលល្ងាចជាមួយទីប្រឹក្សារបស់លោកដោយបាននិយាយអំពីផលប្រយោជន៍នៃការធ្វើជាម្ចាស់របស់កោះនេះ។

ទីប្រឹក្សា ខ្លះយល់ព្រមជាមួយការលើករបស់ លោក ត្រាំ ដោយបានឃើញថា Greenland គឺពោរពេញទៅដោយធនធានធម្មជាតិជាច្រើន ហើយអាចធ្វើជាមូលដ្ឋានកងទ័ពការពារសហរដ្ឋអាមេរិក។ រីឯទីប្រឹក្សាផ្សេងទៀតគិតថាទិញកោះនេះមិនចំណេញអ្វីទេដោយសារសព្វថ្ងៃដាណឺម៉ាកចំណាយថវិកាចិញ្ចឹម Greenland ច្រើនជាងចំណូលដែលបានមកវិញ។

ទេសភាព កោះ Greenland

សូមបញ្ជាក់ថា Greenland ដែលជាកោះធំជាងគេបំផុតក្នុងពិភពលោក គឺជាតំបន់ស្វយ័តមួយរបស់ប្រទេសដាណឺម៉ាក ដែលមានទំហំផ្ទៃដី ២ ១៦៦ ០៨៦ គីឡូម៉ែត្រការ៉េ។ កោះនេះ គឺពោរពេញទៅដោយរ៉ែ ដែលកាលពីមុនមិនអាចជីកយកបានព្រោះផ្ទៃដីភាគច្រើនគឺគ្របដណ្ដប់ដោយទឹកកក។ អាមេរិកមានមូលដ្ឋានទ័ពអាកាស Thule AFB នៅកោះនេះ ដែលមានផ្ទុកប្រព័ន្ធរ៉ាដាចាប់សញ្ញាសកម្មភាពសត្រូវនៅដែនអាកាសប៉ូលខាងជើង។

យ៉ាងណាមិញ លោក ត្រាំ មិនមែនជាប្រធានាធិបតីអាមេរិកដំបូងដែលចង់ទិញ Greenland ទេ ពូលគឺកាលពីឆ្នាំ ១៩៤៦ លោក ហារី ទ្រូម៉ាន់ (Harry Truman) ក៏ចង់ទិញកោះនេះដែរ ក្នុងតម្លៃ ១០០ លានដុល្លារតែមិនបានសម្រេច។ សហរដ្ឋអាមេរិកមានប្រវត្តិទិញដែនដីពីប្រទេសផ្សេងជាច្រើន ដូចជា ការទិញ រដ្ឋ Alaska ពី ប្រទេសរុស្សី កាលពីឆ្នាំ ១៨៦៧ និងតំបន់ Louisiana ពី ប្រទេសបារាំង កាលពីឆ្នាំ ១៨០៣ ជាដើម៕

ចុចអានបន្ត៖

ប្រភព៖ CNN ប្រែសម្រួល៖ សុខ វេងឈាង