និពន្ធនាយកកាសែតភ្នំពេញប៉ុស្តិ៍ ត្រូវបានបណ្តេញចេញពីតួនាទី បន្ទាប់ពីកាសែតនេះដូរម្ចាស់ថ្មី

2018-05-07 09:40:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក កៃ គឹមសុង និពន្ធនាយកកាសែតភ្នំពេញប៉ុស្តិ៍ ត្រូវបានថៅកែថ្មីរបស់កាសែតនេះ បញ្ឈប់ពីការងារហើយ នៅរសៀលថ្ងៃចន្ទទី ០៧ ខែឧសភា ឆ្នាំ ២០១៨នេះ។

ឆ្លើយតបទៅនឹងអ្នកសារព័ត៌មាននៅឯការិយាល័យកាសែតភ្នំពេញប៉ុស្តិ៍ លោក កៃ គឹមសុង បានឱ្យដឹងថា មូលហេតុដែលថៅកែថ្មីបញ្ឈប់រូបលោក គឺដោយសារលោកបានអនុញ្ញាតឲ្យកាសែតនេះ ចេញផ្សាយអត្ថបទ ស្តីពីការដូរម្ចាស់ក្រុមហ៊ុន Post Media ហើយអត្ថបទនោះប៉ះពាល់ដល់មុខមាត់របស់ម្ចាស់ថ្មី។ ម្ចាស់ថ្មីបានចាត់ទុកថាទង្វើនេះ គឺកំហុសឆ្គងដ៏ធំមួយក្នុងនាមលោកជានិពន្ធនាយក។

លោក កៃ គឹមសុង និយាយទៅកាន់អ្នកសារព័ត៌មាន នៅរសៀលនេះ

លោក កៃ គឹមសុង ឱ្យដឹងទៀតថា ទោះយ៉ាងណាក៏ដោយ ក៏លោកនឹងមិនបោះបង់ចោលជំនាញសារព័ត៌មានរបស់លោកនេះចោលដែរ។ លោកអាចនឹងធ្វើជាអ្នកកាសែតដដែល ឬ ជាគ្រូបង្រៀនជំនាញសារព័ត៌មាន។

ក្រោយការបណ្ដេញលោក កៃ គឹមសុង ចេញពីតំណែង បុគ្គលិកជាន់ខ្ពស់មួយចំនួន បាននាំគ្នាដាក់ពាក្យលាឈប់ជាបន្តបន្ទាប់ផងដែរ។ នេះបើតាមសំណេរនៅលើ Twitter របស់បុគ្គលិកកាសែតនេះ។

លោក កៃ គឹមសុង និង សហការី នៅក្នុងការិយាល័យកាសែតភ្នំពេញប៉ុស្តិ៍ នៅរសៀលនេះ

លោក កៃ គឹមសុង ធ្លាប់បានបម្រើការងារជាអ្នកសារព័ត៌មាននៅ កាសែត The Cambodia Daily រយៈពេល១០ឆ្នាំ មុនពេលលោកមកបម្រើការងារនៅកាសែតភ្នំពេញប៉ុស្តិ៍អស់រយៈ១០ឆ្នាំដែរ៕

អត្ថបទពាក់ព័ន្ធ៖ ក្រោយមានបញ្ហារឿងពន្ធដារ កាសែតភ្នំពេញប៉ុស្តិ៍ ត្រូវបានលក់ឲ្យទៅថៅកែម៉ាឡេស៊ី

អត្ថបទ៖ ឃុត សុខឿន