ក្រោយមានបញ្ហារឿងពន្ធដារ កាសែតភ្នំពេញប៉ុស្តិ៍ ត្រូវបានលក់ឲ្យទៅថៅកែម៉ាឡេស៊ី

2018-05-05 15:42:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាសែតភ្នំពេញប៉ុស្តិ៍ ជាភាសាអង់គ្លេស និងភាសាខ្មែរ ត្រូវបានក្រុមហ៊ុនអូស្ត្រាលីដែលជាម្ចាស់ លក់ទៅឲ្យក្រុមហ៊ុនរបស់អ្នកវិនិយោគជាជនជាតិម៉ាឡេស៊ី Sivakumar G. ( Siva )ហើយ។ នេះបើតាមសេចក្តីប្រកាសព័ត៌មានរបស់តំណាងក្រុមហ៊ុន Post Media Ltd។

ក្នុងសេចក្តីប្រកាសព័ត៌មាន ចុះថ្ងៃទី០៥ ខែឧសភា ឆ្នាំ២០១៨នេះ លោក Bill Clough ដែលជាម្ចាស់ក្រុមហ៊ុន Post Media Ltd និងជាចាងហ្វាងការផ្សាយរបស់កាសែត Phnom Penh Post បានលើកឡើងថា លោក Siva ដែលបានទិញយកកាសែត Phnom Penh Post គឺជាអ្នកសារព័ត៌មានដ៏ល្បីល្បាញ និងដ៏មានបទពិសោធន៍ ហើយក៏ជាតំណាងឲ្យក្រុមហ៊ុនវិនិយោគទុនដ៏ធំរបស់ម៉ាឡេស៊ី។

កាសែតភ្នំពេញប៉ុស្តិ៍ជាភាសាអង់គ្លេស ដែលចេញផ្សាយនាពេលកន្លងមក

ក្នុងសេចក្តីប្រកាសដដែល លោក Bill Clough បានបញ្ជាក់ថា កាលពីសប្តាហ៍មុន ក្រុមហ៊ុនកាសែតភ្នំពេញប៉ុស្តិ៍ បានដោះស្រាយ ជាមួយអគ្គនាយកដ្ឋានពន្ធដាររួចរាល់ហើយនូវបញ្ហាដែលពាក់ព័ន្ធនឹងរឿងពន្ធដារ។ ចំណែកករណីនៅតុលាការ ដែលអតីតបុគ្គលិកជាន់ខ្ពស់ជនជាតិបរទេស បានប្តឹងផ្តល់នោះ ក្រុមហ៊ុនកំពុងបន្តដោះស្រាយ នៅតុលាការ ហើយក្រុមហ៊ុន បានបញ្ជាក់ថា ការអនុវត្តដីការឹបអូសទ្រព្យសម្បត្តិរបស់កាសែតភ្នំពេញប៉ុស្តិ៍ ត្រូវបានផ្អាក ដោយរង់ចាំតុលាការកំពូល ជម្រះលើបណ្តឹងឧទ្ធរណ៍។

យ៉ាងណាក៏ដោយ ក្រុមហ៊ុនកាសែតភ្នំពេញប៉ុស្តិ៍ បានបញ្ជាក់ថា ទោះបីជាសេចក្តីសម្រេចរបស់តុលាការ បែបណាក៏ដោយ ក៏កាសែត Phnom Penh Post មិនប្រឈមនឹងការគំរាមកំហែងដល់ដំណើរការនៃការងាររបស់ខ្លួនឡើយ។

កាសែតភ្នំពេញប៉ុស្តិ៍ ជាភាសាអង់គ្លេស បង្កើតឡើងដំបូង កាលពីឆ្នាំ១៩៩២ ដោយលោក Michael Hayes។ នៅឆ្នាំ២០០៨ ក្រុមហ៊ុន Post Media ដែលមានថៅកែជាជនជាតិអូស្ត្រាលី បានទិញកាសែតភ្នំពេញប៉ុស្តិ៍ពីលោក Michael Hayes ហើយចេញផ្សាយប្រចាំថ្ងៃ ជាភាសាអង់គ្លេស និងនៅឆ្នាំ២០០៩ កាសែតភ្នំពេញប៉ុស្តិ៍ បានចេញផ្សាយជាភាសាខ្មែរ៕

លីហៀង