សារព័ត៌មានអាមេរិក និងរុស្ស៊ី ចុះផ្សាយផ្ទុយគ្នា ពាក់ព័ន្ធនឹងរឿង Salah ចូលនិវត្តន៍

2018-06-25 06:36:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពីពេលថ្មីៗនេះ រឿងរបស់តារាបាល់ទាត់ឆ្នើមរបស់ក្លឹប Liverpool និងក្រុមជម្រើសជាតិអេហ្ស៊ីប Mohamed Salah កំពុងផ្ទុះឡើងយ៉ាងខ្លាំង បន្ទាប់ពីមានសេចក្ដីរាយការណ៍ពីសារព័ត៌មាន CNN របស់អាមេរិកថា កីឡាកររូបនេះមានបំណងចូលនិវត្តន៍ ពីក្រុមជម្រើសជាតិ ក្រោយអេហ្ស៊ីបធ្លាក់ពី World Cup ។ ក៏ប៉ុន្តែ ប្រភព RT របស់រុស្ស៊ី បានដកស្រង់សម្ដីមន្ត្រីជាន់ខ្ពស់ពីសហព័ន្ធបាល់ទាត់អេហ្ស៊ីប ដោយច្រានចោលការលើកឡើងនោះ។

Salah (រូបថត៖ Ramil Sitdikov)

យោងតាមសារព័ត៌មាន CNN បានចុះផ្សាយកាលពីថ្ងៃទី២៤ ខែមិថុនាថា Salah មិនសប្បាយចិត្តនឹងរឿងយកគេទៅពាក់ព័ន្ធនឹងនយោបាយ ដែលបានកើតឡើងនៅក្រុង Grozny រដ្ឋ Chechnya ដែលជាទីតាំងហ្វឹកហាត់របស់ក្រុមជម្រើសជាតិអេហ្ស៊ីប ក្នុងព្រឹត្តិការណ៍ FIFA World Cup 2018 ។ សេចក្ដីរាយការណ៍បានឲ្យដឹងថា មេដឹកនាំ Chechnya លោក Ramzan Kadyrov បានទៅជួប Salah លក្ខណៈឯកជន និងបានផ្តល់សញ្ជាតិ Chechnya ឲ្យ Salah ផងដែរ។

សូមបញ្ជាក់ថា លោក Kadyrov ដែលឡើងកាន់អំណាចកាលពីឆ្នាំ២០០៤ បានគាំទ្រចលនាផ្ដាច់ខ្លួនមួយពីរុស្ស៊ី ដែលអូសបន្លាយជិត ២ទសវត្សរ៍មកហើយ។

យ៉ាងណាក៏ដោយ អ៊ីម៉ែលមួយពីសហព័ន្ធកីឡាបាល់ទាត់អេហ្ស៊ីបដែលត្រូវបានផ្ញើទៅកាន់ CNN បានបង្ហាញពីភាពភ្ញាក់ផ្អើលរបស់សហព័ន្ធ ចំពោះរឿងរបស់ Salah ហើយកីឡាករវ័យ២៦ឆ្នាំនេះ មិនបានជូនដំណឹងនេះមកកាន់សហព័ន្ធនៅឡើយទេ។

Salah ជួបជាមួយមេដឹកនាំរដ្ឋ Chechnya លោក Ramzan Kadyrov នៅក្រុង Grozny ដែលជាទីតាំងហ្វឹកហាត់របស់ក្រុមជម្រើសជាតិអេហ្ស៊ីប ក្នុងព្រឹត្តិការណ៍ FIFA World Cup 2018 (រូបថត៖ twitter.com/championat)

ដោយឡែក សារព័ត៌មាន RT នៅថ្ងៃទី២៤ មិថុនាដដែល បានចុះផ្សាយពីការច្រានចោលនូវសេចក្ដីរាយការណ៍របស់ CNN ។ លោក Osama Ismail ប្រធានផ្នែកទំនាក់ទំនងសាធារណៈរបស់ក្រុមជម្រើសជាតិអេហ្ស៊ីប បានបដិសេធការលើកឡើងខាងលើ។

«Mohamed Salah កំពុងនៅហ្វឹកហាត់ជាមួយមិត្តរួមក្រុមដទៃទៀត។ គេនៅជាមួយពួកយើងរាល់ការប្រកួត។ គេមិនបានបង្ហាញការមិនពេញចិត្តចំពោះមន្ត្រីកីឡាណាម្នាក់ឡើយ។ គេមិនបានប្រាប់អ្វីទាក់ទងនឹងការលើកឡើងនោះទេ»។ លោក Ismail បានប្រាប់ RT តាមទូរសព្ទយ៉ាងដូច្នេះ។

លោកបន្តថា មិនគួរជឿលើការអះអាងនានា ដែលសាមីកីឡាករមិនទាន់បានប្រកាសជាផ្លូវការនោះទេ។ «ខ្ញុំអត់ដឹងថា CNN បានព័ត៌មាននេះ ពីណាមកទេ... អ្នកមិនគួរជឿលើព័ត៌មានណាឡើយ ដរាបណាគេ (Salah) បង្ហោះលើគណនី Twitter របស់គេផ្ទាល់»។

គួរជម្រាបថា អេហ្ស៊ីបបានធ្លាក់ត្រឹមវគ្គសន្សំពិន្ទុ World Cup បន្ទាប់ពីបរាជ័យ២លើក កន្លងទៅ។ ម៉ោង៩យប់ថ្ងៃទី២៥មិថុនានេះ អេហ្ស៊ីបត្រូវប៉ះ អារ៉ាប៊ីសាអ៊ូឌីត ក្នុងការប្រកួតបិទពូល A ដើម្បីជាការបង្គ្រប់កិច្ច៕

អត្ថបទ៖ លាភ.