កាស៊ីណូណាហ្គា ទទួលបានប្រាក់ចំណេញសុទ្ធដល់ ១៨០លានដុល្លារ ក្នុងរយៈពេល ៦ខែ

2018-07-27 07:04:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនកាស៊ីណូណាហ្គា ទទួលបានប្រាក់ចំណេញសុទ្ធ ១៨០ លានដុល្លារនៅឆមាសទីមួយឆ្នាំ២០១៨នេះ កើនឡើងជិត ២០ភាគរយបើធៀបនឹងរយៈពេលដូចគ្នាឆ្នាំមុន។ កំណើនប្រាក់ចំណេញនេះ ដោយសារកំណើនអ្នកលេងល្បែងលំដាប់ខ្ពស់ដែលជាជនជាតិចិន។ នេះបើយោងតាមរបាយការណ៍ហិរញ្ញវត្ថុរបស់ក្រុមហ៊ុនដែលចេញផ្សាយនៅសប្តាហ៍នេះ។

ប្រាក់ចំណេញរបស់ណាហ្គានៅឆមាសទីមួយឆ្នាំនេះ គឺច្រើនជាងចំនួនប្រាក់ចំណេញរបស់ធនាគារអេស៊ីលីដា ដែលជាធនាគារធំជាងគេនៅកម្ពុជា សម្រាប់រយៈពេលមួយឆ្នាំពេញទៅទៀត។ កាលពីឆ្នាំ ២០១៧ អេស៊ីលីដាទទួលបានប្រាក់ចំណេញសុទ្ធ (ចំណេញបន្ទាប់ពីបង់ពន្ធរួច) ចំនួន ៩២,៥ លានដុល្លារ។

អគារកាស៊ីណូណាហ្គា នៅសួនសម្តេច ហ៊ុន សែន ក្នុងពេលរាត្រី

របាយការណ៍របស់ក្រុមហ៊ុន Naga Corp ដែលជាប្រតិបត្តិករសណ្ឋាគារ និងកាស៊ីណូណាហ្គា នៅកម្ពុជា និងជាក្រុមហ៊ុនចុះបញ្ជីក្នុងផ្សារហ៊ុនហុងកុងបានបង្ហាញថា ប្រាក់ចំណូលសរុបរបស់ណាហ្គានៅឆមាសទីមួយឆ្នាំនេះមានរហូតដល់ ៧៣២ លានដុល្លារ កើនឡើង ១៦២ភាគរយពីរយៈពេលដូចគ្នាកាលពីឆ្នាំមុន។

លោក ហ្វីលីព លី អនុប្រធានក្រុមហ៊ុន NagaCorp បានឲ្យដឹងថាកំណើនភ្ញៀវចិនមកកម្ពុជាគឺជាឥទ្ធិពលវិជ្ជមានសម្រាប់ប្រតិបត្តិការកាស៊ីណូណាហ្កា។ កាលពីឆ្នាំមុន ភ្ញៀវទេសចរចិនមកកម្ពុជាបានកើនដល់ ១,២ លាននាក់ កើនឡើង ៤៦ ភាគរយពីឆ្នាំ ២០១៦។

លោកថ្លែងថា៖ «ដោយសារកំណើនដ៏ខ្លាំងក្លានូវវិនិយោគិនចិនមកកម្ពុជា ចំនួនជនបរទេសជាជនជាតិចិននៅភ្នំពេញក៏កើនឡើងខ្លាំងផងដែរ»។ លោកបនុ្តថា មានកត្តាទាក់ទាញជាច្រើនសម្រាប់ពាណិជ្ជករចិនក្នុងការកម្សាន្តនាពេលរាត្រីនៅណាហ្គា។ លោកថ្លែងថា៖ «ការបង្កើតឲ្យមានណាហ្គា២ គឺជាផលិតផលដ៏ត្រឹមត្រូវ និងចំពេលវេល»៕

អត្ថបទទាក់ទង៖ ៣ខែដើមឆ្នាំ២០១៨ កាស៊ីណូណាហ្គាវើល កើនប្រាក់ចំណូល ១៨១ភាគរយ

អត្ថបទ៖ ផាក បញ្ញា