៣ខែដើមឆ្នាំ២០១៨ កាស៊ីណូណាហ្គាវើល កើនប្រាក់ចំណូល ១៨១ភាគរយ

2018-04-05 08:48:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាស៊ីណូណាហ្គាវើល បានកើនប្រាក់ចំណូល (gross gaming revenue) ១៨១ភាគរយ ក្នុងត្រីមាសទី១ ឆ្នាំ២០១៨ (មករា ដល់មីនា) បើធៀបរយៈពេលដូចគ្នាកាលពីឆ្នាំ២០១៧។ នេះបើតាមការចុះផ្សាយរបស់កាសែតភ្នំពេញប៉ុស្តិ៍ នាថ្ងៃទី៥ ខែមេសានេះ ដោយយោងតាមឯកសារហិរញ្ញវត្ថុ របស់ក្រុមហ៊ុនកាស៊ីណូណាហ្គាវើល។

កាសែតដដែល បានបន្ថែមថា ប្រាក់ចំណូលក្នុងរយៈពេល ៣ខែដើមឆ្នាំ២០១៨ របស់ណាហ្គាវើល គឺមានចំនួន ២៤៣,២លានដុល្លារអាមេរិក។ ចំណែកឯការភ្នាល់ល្បែងថ្នាក់វីអាយភី បានកើនឡើងពី ៣,៧៣ពាន់លានដុល្លារ កាលពីត្រីមាសទី១ ឆ្នាំ២០១៧ ដល់ ៥,៦៤ពាន់លានដុល្លារ ក្នុងត្រីមាសដំបូង ឆ្នាំ២០១៨ នេះ។

ក្រុមហ៊ុនបានសន្មតថា កំណើននេះ បានមកពីភាពជោគជ័យរបស់ Naga2 ដែលបានទាក់ទាញអ្នកលេងល្បែងថ្នាក់វីអាយភីជាប្រចាំ គិតចាប់តាំងពីពេលបើកដំណើរការកាលពីខែតុលា ឆ្នាំមុន។

គួររំលឹកផងដែរថា កាលពីឆ្នាំ២០១៧ កាស៊ីណូណាហ្គាវើល បានកើនឡើងប្រាក់ចំណូលពីការលេងល្បែង (gross gaming revenue) ចំនួន ៨៥ភាគរយ បើធៀបឆ្នាំ២០១៦ ខណៈប្រាក់ដែលចរាចរក្នុងការលេងល្បែងថ្នាក់វីអាយភី មានចំនួន ២១,១ពាន់លានដុល្លារអាេមេរិក៕

អត្ថបទទាក់ទង៖ NAGA គ្រោងពង្រីកសេវាកម្មជើងហោះហើរ ដើម្បីចាប់យកកំណើនជនជាតិចិន

អត្ថបទ៖ សុខ សុវត្ថិ