សមាជិក​ក្រុម​ប្រឹក្សា​ព្រឹទ្ធាចារ្យ​គណបក្ស ៣រូប​នៃ​គណបក្ស​ហ៊្វុនស៊ិនប៉ិច គឺ​លោក យូ ហុកគ្រី លោក ប៉ោ ប៊ុនស្រ៊ឺ និង​លោក ញ៉េប ប៊ុនជិន ព្រមទាំង​អនុ​ប្រធាន​គណបក្ស​ហ៊្វុនស៊ិនប៉ិច លោក យឹម សាវី បាន​ប្រកាស​លាលែង​ពីមុខ​តំណែង ដោយ​មន្រ្តី​ទាំង៤ លើក​ហេតុផល​ដូចគ្នា​ថា ពុំអាច​បំពេញ​តួនាទី​ទាំងនេះ បាន​ប្រសិទ្ធភាព​ឡើយ។ នេះ​បើយោង​តាម​លិខិត​សុំ​លាលែង​ពី​តំណែង របស់​មន្រ្តីទាំង​៤រូប ដែល​បាន​ចុះ​ហត្ថលេខា​រួមគ្នា កាលពី​ថ្ងៃទី១៨ ខែ​សីហា ឆ្នាំ​២០១៨ ផ្ញើទៅ​កាន់​សម្តេច​ក្រុមព្រះ នរោត្តម រណឬទ្ធិ ព្រះ​ប្រធាន​គណបក្សហ៊្វុនស៊ិនប៉ិច។

ក្នុង​លិខិត​នេះ បញ្ជាក់​ថា មន្រ្តី​ទាំង៤​រូប សុំ​រក្សាទុក​ស្ថានភាព​ជា​សមាជិក​ស្រប​តាម​លក្ខន្តិកៈ របស់​គណបក្ស​ហ៊្វុនស៊ិនប៉ិច​តែ​ប៉ុណ្ណោះ។

សូម​រំលឹក​ថា កាលពី​ថ្ងៃទី​៨ ខែ​សីហា ឆ្នាំ​២០១៨ សម្តេច​ក្រុមព្រះ បាន​តែងតាំង​មុខ​តំណែង​លោក យូ ហុកគ្រី លោក ប៉ោ ប៊ុនស្រ៊ឺ និង​លោក ញ៉េប ប៊ុនជិន ជា​សមាជិក​ក្រុមប្រឹក្សា​ព្រឹទ្ធាចារ្យ​គណបក្ស​ នៃ​គណបក្ស​ហ៊្វុនស៊ិនប៉ិច។ ការ​តែងតាំង​នេះ គឺ​ក្រោយពេល​ដែល​សម្តេច​ក្រុមព្រះ បាន​បញ្ចប់មុខ​តំណែង​មន្រ្តី​ទាំង៣​រូបនេះ ពី​អនុ​ប្រធាន​គណបក្ស​ហ៊្វុនស៊ិនប៉ិច និង​មុខតំណែង​ផ្សេងៗ​ទៀត៕

អត្ថបទ​ទាក់ទង៖ សម្តេច​ក្រុម​ព្រះ បញ្ចប់​តំណែង​អនុប្រធាន-អគ្គលេខាធិការ​រង​គណបក្ស​ហ៊្វុនស៊ិនប៉ិច៤​រូប