ចាន់ វឌ្ឍនាកា ចាកចេញទៅម៉ាឡេស៊ី ថ្ងៃនេះ

2019-01-17 03:59:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខ្សែប្រយុទ្ធនៃក្រុមបាល់ទាត់ជម្រើសជាតិកម្ពុជា និងក្លឹបបាល់ទាត់បឹងកេត ចាន់ វឌ្ឍនាកា បានចាកចេញទៅកាន់ប្រទេសម៉ាឡេស៊ី តាមជើងហោះហើរពីព្រលានយន្តហោះអន្តរជាតិភ្នំពេញ ដើម្បីចុះកុងត្រាជាផ្លូវការជាមួយក្លឹបបាល់ទាត់ PKNS ។ នេះបើយោងតាមការបង្ហោះសារលើបណ្ដាញទំនាក់ទំនងសង្គមហ្វេសប៊ុករបស់ វឌ្ឍនាកា នាព្រឹកថ្ងៃទី១៧ ខែមករា ឆ្នាំ២០១៩នេះ។

ចាន់ វឌ្ឍនាកា បង្ហោះនៅលើទំព័រហ្វេសប៊ុកផ្លូវការរបស់ខ្លួន នៅព្រឹកថ្ងៃទី១៧ ខែមករា ឆ្នាំ២០១៩

នេះជាការចាកចេញ ជាលើកទីពីររបស់ វឌ្ឍនាកា ដើម្បីទៅប្រកបអាជីពនៅក្លឹបលីគកំពូលម៉ាឡេស៊ី បន្ទាប់ពី កីឡាកររូបនេះ ធ្លាប់ចូលរួមជាមួយក្លឹប Pahang FA កាលពីជើងទី១ រដូវកាល២០១៨ កន្លងទៅ។ ការផ្ទេររបស់កីឡាកររហស្សនាម CV11 ត្រូវបានប្រកាសជាផ្លូវការដោយក្លឹបបឹងកេត តាមរយៈពេលវីដេអូអរគុណ វឌ្ឍនាកា ផ្ទេរទៅកាន់ក្លឹប PKNS កាលពីថ្ងៃទី១៥ ខែមករា ឆ្នាំ២០១៩។

ចាន់ វឌ្ឍនាកា ដែលមានប្រភពពីខេត្តកំពត ទទួលការចាប់អារម្មណ៍យ៉ាងខ្លាំងពីសំណាក់គ្រូបង្គោលក្លឹប PKNS គឺលោក Datuk K. Rajagobal បន្ទាប់ពីលោកសម្រេចចិត្តជ្រើសរើសយក វឌ្ឍនាកា ដើម្បីយកទៅបំពេញកូតាកីឡាករអាស៊ាន សម្រាប់រដូវកាល ២០១៩ខាងមុខ។ ការសម្រេចនេះ បន្ទាប់ពីលោក ប្រៀបធៀបជម្រើសពីរ គឺ វឌ្ឍនាកា និងកីឡាកររបស់សិង្ហបុរី គឺ Gabriel Quak ។

សូមរំឭកថា PKNS ជាក្លឹបដែលបានបញ្ចប់នៅចំណាត់ថ្នាក់លេខ៣ នៅលីគកំពូលម៉ាឡេស៊ី កាលពីរដូវកាល២០១៨ ដោយឈរនៅលើ ក្លឹបលេខ៤ Pahang FA ដែលជាអតីតក្លឹបដែល ចាន់ វឌ្ឍនាកា ធ្លាប់ប្រកបអាជីពនៅទីនោះ។ ក៏ប៉ុន្តែ Pahang និង វឌ្ឍនាកា បានចែកផ្លូវគ្នាកាលពីពាក់កណ្ដាលរដូវកាល២០១៨៕

អត្ថបទទាក់ទង

អត្ថបទ៖ លាភ.