លោក ខឹម វាសនា៖ សាន្ត ប៊ុនធឿន ប្រមាថជីវិតមនុស្ស ដូចរស់នៅប្រទេសអត់ច្បាប់

2017-12-20 04:55:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ខឹម វាសនា ប្រមុខគណបក្សសម្ព័ន្ធដើម្បីប្រជាធិបតេយ្យ បានថ្លែងប្រាប់ខ្លីៗនាព្រឹកថ្ងៃទី២០ ខែធ្នូនេះថា អ្វីដែលឈ្មោះ សាន្ត ប៊ុនធឿន បាននិយាយប្រមាថមកលើរូបលោក វាហាក់ដូចជាស្រុកអត់មានច្បាប់ទម្លាប់។

លោក ខឹម វាសនា បន្ថែមថា៖ "ឈ្មោះ សាន្ត ប៊ុនធឿន និយាយដូចជាមនុស្សនៅកណ្តាលព្រៃ ហើយគួរតែអូសមនុស្សហ្នឹងឲ្យមកទទួលខុសត្រូវចំពោះមុខច្បាប់ កុំឲ្យចេះតែនិយាយលើសហ្នឹងទៅទៀត បើហ៊ាននិយាយប្រមាថដល់អាយុជីវិតរបស់មនុស្ស ប្រៀបដូចថានៅក្នុងប្រទេសកម្ពុជា វាអត់មានច្បាប់។ បើតុលាការមើលឃើញថាច្បាប់ត្រូវចាត់ការបែបណានោះ គឺតាមហ្នឹងទៅ។ តុលាការគួរតែដឹងមុខនាទីរបស់ខ្លួនហើយ"។

លោក ខឹម វាសនា នៅក្នុងវេទិកាជួបជុំសមាជិក និងអ្នកគាំទ្រគណបក្ស LDP ថ្ងៃ១៧ ធ្នូ (រូបថត៖ LDP Photos)

គួរបញ្ជាក់ថា តំណាងលោកខឹម វាសនា គឺលោក ឆឺយ ប៊ុនធឿន បានដាក់ពាក្យបណ្តឹងប្តឹងលោក សាន្ត ប៊ុនធឿន ចាងហ្វាងកាសែតអ្នកស្នេហាជាតិ ទៅតុលាការសាលាដំបូងរាជធានីភ្នំពេញ កាលពីថ្ងៃទី១៨ ខែធ្នូ ឆ្នាំ២០១៧ ពីបទគំរាមកំហែងថានឹងសម្លាប់។ ការប្តឹងនេះ គឺយោងទៅលើភស្តុតាងមួយចំនួន រួមមាន វីដេអូដែលលោកសាន្ត ប៊ុនធឿន បង្ហោះជាសាធារណៈ កាលពីថ្ងៃទី១៦ ខែធ្នូ ឆ្នាំ២០១៧។

លោក សាន្ត ប៊ុនធឿន តាមរយៈការផ្សាយផ្ទាល់លើហ្វេសប៊ុកកាលពីយប់មិញនេះ បានអះអាងថាលោកមិនភ័យព្រួយចំពោះពាក្យបណ្ដឹងនេះទេ៕