ក្រុមឈ្នះ World Cup បានត្រឹមពានសិប្បនិមិត្ត ឯពានពិតនៅ...
- 2018-06-15 07:44:44
- ចំនួនមតិ 0 | ចំនួនចែករំលែក 0
ក្រុមឈ្នះ World Cup បានត្រឹមពានសិប្បនិមិត្ត ឯពានពិតនៅ...
ចន្លោះមិនឃើញ
ពាន World Cup នឹងមិនត្រូវក្លាយជាកម្មសិទ្ធិរបស់ក្រុមដែលឈ្នះនោះទេ។ ក្រុមដែលឈ្នះការប្រកួត នឹងទទួលបានពានសិប្បនិមិត្តជំនួសវិញ ឯពានមាសពិតគឺត្រូវសហព័ន្ធ FIFA រក្សាទុកដដែល។
ចាប់តាំងពីបង្កើតព្រឹត្តិការណ៍បាល់ទាត់ពិភពលោក World Cup មក ពានរង្វាន់មាសត្រូវបានផលិតចំនួនតែ ២ពានគត់ប៉ុណ្ណោះ ដោយ១ប្រើនៅចន្លោះឆ្នាំ១៩៣០ ដល់ឆ្នាំ១៩៧០ ហើយ១ទៀតប្រើពីឆ្នាំ១៩៧៤ មកទល់នឹងបច្ចុប្បន្ន។ ពាន World Cup ដំបូងមានឈ្មោះ Victory តែត្រូវកែឈ្មោះមក Jules Rimet វិញនៅឆ្នាំ១៩៤៦ ដើម្បីជាគោរពដល់លោក Jules Rimet ដែលជាស្ថាបនិកបង្កើតឲ្យមាន World Cup។
ពាន Jules Rimet មានប្រវត្តិសាស្ត្រជូរចត់ច្រើន ឈានរហូតដល់ការបាត់ដំណឹងសូន្យឈឹងរកលែងឃើញ។ ពាននេះធ្លាប់ត្រូវគេលួចម្ដងនៅឆ្នាំ១៩៦៦ ក្នុងប្រទេសអង់គ្លេស។ បាត់មិនយូរប៉ុន្មាន Jules Rimet ក៏ត្រូវគេប្រទះឃើញវិញ ដោយបានជំនួយពិសេសពីឆ្កែស៊ើបអង្កេតរបស់ប៉ូលិសមួយក្បាលឈ្មោះ Pickles។
ច្បាប់ដំបូងរបស់ FIFA បានចែងថា ក្រុមមកពីប្រទេសណាក៏ដោយឲ្យតែឈ្នះការប្រកួត World Cup ចំនួន ៣ដង នឹងអាចយកពាន Jules Rimet ទៅផ្ទះជាមួយបាន។ ព្រោះជាម្ចាស់ជើងឯក World Cup ៣ជំនាន់ (១៩៥៨, ១៩៦២ និង ១៩៧០) ប្រទេសប្រេស៊ីលក៏ទទួលបានពាន Jules Rimet ជារបស់កម្មសិទ្ធិពេញដៃពេញជើង។ តែជារឿងអកុសល ប្រទេសដែលគ្រប់គ្រងពាន World Cup ដំបូងគេនេះ មិនអាចថែរក្សារង្វាន់របស់ខ្លួនឲ្យស្ថិតស្ថេរបានឡើយ។ ពាន Jules Rimet ត្រូវគេលួចចេញពីតំបន់ Rio de Janeiro ប្រទេសប្រេស៊ីល នៅឆ្នាំ១៩៨៣។ ចាប់តាំងពីនោះមក ពាន World Cup ទី១លើពិភពលោក បានបាត់ស្រមោលជារៀងរហូត។ មនុស្សភាគច្រើនយល់ឃើញថា ពាននោះច្បាស់ជាត្រូវក្រុមចោរលួចយកទៅរំលាយបាត់អស់ហើយ។
ប្រគល់ពានឲ្យទៅប្រេស៊ីលរួច FIFA ក៏ចាប់ផ្ដើមបង្កើតពាន World Cup ថ្មីមួយទៀត សម្រាប់ការប្រកួតនាឆ្នាំ១៩៧៤។ ពាននេះឈ្មោះថា FIFA World Cup Trophy។ មិនដូចលើកមុន FIFA បានកំណត់ច្បាប់ថ្មីថា ពានរង្វាន់នឹងមិនត្រូវប្រគល់ឲ្យក្រុមណាកាន់កាប់នោះឡើយ។ ហេតុដូច្នេះហើយក្រុមដែលឈ្នះ បានត្រឹមវេចខ្ចប់ពាន់សិប្បនិមិត្តទៅផ្ទះជាមួយតែប៉ុណ្ណោះ ឯពានពិតគឺនៅរក្សាទុកដោយ FIFA។
ពាន FIFA World Cup Trophy មានកម្ពស់ ៣៦,៨សង់ទីម៉ែត្រ និងទម្ងន់ ៦,១៤២គីឡូក្រាម ធ្វើពីមាស 18K។ វាត្រូវបានរចនាដោយវិចិត្រករអ៊ីតាលីម្នាក់ឈ្មោះ Silvio Gazzaniga។ នៅលើពាន មានឆ្លាក់រូបកីឡាករចំនួន២នាក់កំពុងលើកដៃអបអរសាទរជ័យជំនះ៕