លោក Duterte ទម្លាយថា គាត់បានបញ្ជាដោយផ្ទាល់ ឲ្យចាប់ខ្លួនដូនជីអូស្ត្រាលីម្នាក់

2018-04-19 01:50:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីហ្វីលីពីន Rodrigo Duterte កាលពីថ្ងៃទី១៨ ខែមេសា ២០១៨ ម្សិលមិញ បាននិយាយថា លោកបានបញ្ជាដោយផ្ទាល់ ឲ្យចាប់ខ្លួនស្រ្ដីអូស្រ្ដាលី ជាដូនជីកាតូលិកម្នាក់ ហើយលោកបានព្រមានជនបរទេសដែលធ្វើការរិះគន់រដ្ឋាភិបាលហ្វីលីពីនថា នឹងប្រឈមការបញ្ជូនទៅប្រទេសកំណើតរបស់ពួកគេវិញ។

លោក Rodrigo Duterte ប្រធានាធិបតីហ្វីលីពីន

ស្រ្ដីដែលត្រូវបានចាប់ខ្លួនដោយប៉ូលិសនាយកដ្ឋានអន្តោប្រវេសន៍ហ្វីលីពីន ក្រោមបញ្ជាផ្ទាល់ពីលោក Duterte នោះ មានឈ្មោះ Patricia Fox វ័យ ៧១ឆ្នាំ។ ស្រ្ដីរូបនេះ ត្រូវបានចាប់ខ្លួននៅថ្ងៃទី១៦ ខែមេសា ២០១៨ ដោយសង្ស័យថា ជាប់ពាក់ព័ន្ធនិងសកម្មភាពនយោបាយ។ ប៉ុន្ដែនៅថ្ងៃបន្ទាប់ ស្ដ្រីរូបនេះ ត្រូវបានសមត្ថកិច្ចហ្វីលីពីនដោះលែង ដោយពុំមានការចោទប្រកាន់ទោសណាមួយនោះទេ។

ដូនជីកាតូលិក Patricia Fox ជនជាតិអូស្រ្ដាលី

សូមបញ្ជាក់ថា កាលពីថ្ងៃទី១៥ ខែមេសា ២០១៨ កន្លងទៅ រដ្ឋាភិបាលហ្វីលីពីនក៏បានបដិសេធមិនឲ្យអគ្គលេខាធិការរងនៃបក្សសង្គមនិយមអឺរ៉ុប លោក Giacomo Filibeck ចូលមកក្នុងទឹកដីហ្វីលីពីនដែរ ក្រោយលោកបានធ្វើដំណើរមកដល់អាកាសយានដ្ឋានអន្តរជាតិ Nactan-Cebu របស់ហ្វីលីពីន។ ការមិនអនុញ្ញាតឲ្យចូលមកក្នុងទឹកដីហ្វីលីពីននេះ ដោយសារលោក Giacomo Filibeck ជនជាតិអ៊ីតាលី បានធ្វើការរិះគន់យ៉ាងខ្លាំង មកលើយុទ្ធនាការប្រយុទ្ធប្រឆាំងគ្រឿងញៀនរបស់រដ្ឋាភិបាលលោក Duterte៕