ទណ្ឌិត ៣១៩នាក់ ត្រូវបានពិចារណាលើកលែងទោស ក្នុងឱកាសបុណ្យភ្ជុំបិណ្ឌ

2018-10-02 07:36:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ជិន ម៉ាលីន អ្នកនាំពាក្យក្រសួងយុត្តិធម៌ បានបញ្ជាក់ថា មានអ្នកទោសនៅកម្ពុជាបានស្នើសុំលើកលែង និងបន្ធូរបន្ថយទោសចំនួន ៣១៩នាក់ ខណៈគណៈកម្មាធិការលើកលែងទោស និងបន្ធូរបន្ថយទោសកំពុងពិចារណាចំពោះការស្នើសុំមកពីតាមបណ្ដាពន្ធនាគារ ក្នុងឱកាសបុណ្យភ្ជុំបិណ្ឌ ដែលកាន់តែខិតជិតមកដល់។

លោក ជិន ម៉ាលីន អ្នកនាំពាក្យក្រសួងយុត្តិធម៌

លោក ជិន ម៉ាលីន ថ្លែងថា “មកដល់ពេលនេះ គឺគណៈកម្មការកំពុងតែពិចារណាលើសំណើស្នើសុំពីតាមពន្ធនាគារ តាមមណ្ឌលអប់រំកែប្រែទាំងបួន។ ចំនួនដែលស្នើសុំ ៣១៩នាក់ ក្នុងនោះ មានចំនួន ១៣៣នាក់ជាស្ដ្រី”។

លោកបន្ថែមថា ក្រសួងយុត្តិធម៌មិនទាន់សម្រេចនៅឡើយ ហើយក៏អត់ទាន់កំណត់ថ្ងៃបើកកិច្ចប្រជុំដែរ។ លោកថា ការលើកលែង និងបន្ធូរបន្ថយទោសនេះ ដោយផ្អែកលើគោលការណ៍ច្បាប់ និងមនុស្សធម៌ ដូច្នេះគោលការណ៍មនុស្សធម៌ រួមមាន ស្ដ្រីមានផ្ទៃពោះ ស្ដ្រីដែលមានកូនក្នុងពន្ធនាគារ ជនចាស់ជរា អ្នកមានជំងឺ និងអ្នកកែប្រែខ្លួនជាដើម។

គួររម្លឹកថា កាលពីឆ្នាំ២០១៧ ព្រះមហាក្សត្របានព្រះរាជទានបន្ធូរបន្ថយ និងលើកលែងទោសដល់ទណ្ឌិតសរុបចំនួន ១៥៧នាក់ ក្នុងនោះស្រី២០នាក់ ដោយក្នុងពិធីបុណ្យចូលឆ្នាំប្រពៃណីខ្មែរចំនួន ៧២នាក់ ពិធីបុណ្យពិសាខបូជាចំនួន ៣៥នាក់ និងពិធីបុណ្យអុំទូកបណ្ដែតប្រទីប សំពះព្រះខែ និងអកអំបុកចំនួន ៥០នាក់។

សូមបញ្ជាក់ថា ក្នុងជំនួបសំណេះសំណាលជាមួយពលរដ្ឋខ្មែរនៅអាមេរិក នាពេលថ្មីៗនេះ សម្ដេច ហ៊ុន សែន នាយករដ្ឋមន្ដ្រីកម្ពុជា មានប្រសាសន៍ថា នៅឆ្នាំ២០១៨ សម្ដេចនឹងស្នើសុំព្រះមហាក្សត្រ ដើម្បីឲ្យព្រះអង្គព្រះរាជទានលើកលែង និងបន្ធូរបន្ថយទោសទ្រង់ទ្រាយធំបន្ថែម លើកម្មវិធីលើកលែងទោសប្រចាំឆ្នាំ ដូចជា បុណ្យភ្ជុំបិណ្ឌ បុណ្យឯករាជ្យជាតិ និងការប្រារព្ធខួប ២០ឆ្នាំនៃការបញ្ចប់សង្គ្រាមស៊ីវិលនៅកម្ពុជា។

សម្ដេចនាយករដ្ឋមន្រ្តីអះអាងថា ការលើកលែងទោសធ្វើឡើង ដើម្បីឲ្យខ្មែររួបរួមគ្នា កុំឲ្យបែកបាក់គ្នា និងឲ្យជនទាំងនោះ បានចេញមកកែប្រែខ្លួន កុំឲ្យប្រមាថ មាក់ងាយគ្នាតទៅទៀត៕