សម្តេច ហ៊ុន សែន និងលោក កឹម សុខា ដឹកនាំក្រុមតំណាងរាស្ត្រចូលប្រជុំសភាព្រឹកនេះ

2017-06-20 01:33:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បើមិនមាការប្រែប្រួលទេ តាមកម្មវិធីសម្ដេច ហ៊ុន សែន ប្រមុខដឹកនាំគណបក្សប្រជាជនកម្ពុជា និងលោក កឹម សុខា ប្រធានគណបក្សសង្គ្រោះជាតិ ដឹកនាំក្រុមតំណាងរាស្ត្ររបស់គណបក្សខ្លួន ចូលរួមប្រជុំសភានៅព្រឹកថ្ងៃទី២០ មិថុនា ២០១៧នេះ ដើម្បីពិភាក្សា និងអនុម័តសេចក្ដីស្នើច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា។

ក្នុងនោះ សម្តេច ហេង សំរិន ប្រធានរដ្ឋសភា ដឹកនាំសម័យប្រជុំរដ្ឋសភាលើកទី៨ នីតិកាលទី៥ នៅព្រឹកថ្ងៃទី២០ ខែមិថុនានេះ។

សេចក្ដីស្នើច្បាប់ស្ដីពីការបោះឆ្នោតជ្រើសតាំងសមាជិកព្រឹទ្ធសភា ដែលរដ្ឋសភានឹងបើកកិច្ចប្រជុំពេញអង្គពិភាក្សា និងអនុម័ត នៅថ្ងៃនេះ ធ្វើឡើងតាមស្មារតី នៃកិច្ចព្រមព្រៀងបញ្ចប់ជម្លោះនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិកាលពីថ្ងៃទី២២ កក្កដា ២០១៤ កន្លងមកនេះ។ សេចក្ដីស្នើច្បាប់នេះ ស្នើឡើងដោយសមាជិកព្រឹទ្ធសភាចំនួន ២៣រូប។

សេចក្ដីស្នើច្បាប់ស្តីពី ការបោះឆ្នោតជ្រើសតាំងសមាជិកព្រឹទ្ធសភា ដែលគណបក្សទាំងពីរ បានកែសម្រួលធ្វើថ្មីនោះ បានកំណត់ពីការបង្កើនចំនួនអាសនៈសមាជិកព្រឹទ្ធសភា ១អាសនៈទៀត គឺពី ៦១រូប ដល់ ៦២រូប ព្រមទាំងកែប្រែមាត្រាមួយចំនួនទៀត ដូចជាកាត់បន្ថយរយៈពេលយុទ្ធនាការឃោសនាបោះឆ្នោតព្រឹទ្ធសភា ពី ២១ថ្ងៃ មកនៅត្រឹម ១៤ថ្ងៃ ព្រមទាំងការបញ្ចូលអង្គបោះឆ្នោតថ្មីទៅបោះឆ្នោតជំនួសអង្គបោះឆ្នោតចាស់ និងលើកពេលបោះឆ្នោតព្រឹទ្ធសភា ពីខែមករា ទៅខែកុម្ភៈ ជាដើម។

សូមបញ្ជាក់ថា ព្រឹទ្ធសភា ត្រូវបានបង្កើតឡើងនៅក្រោយការបោះឆ្នោតជាសកល ជ្រើសតាំងតំណាងរាស្ត្រ នីតិកាលទី២ នាថ្ងៃទី២៦ កក្កដា ១៩៩៨។ ព្រឹទ្ធសភា នីតិកាលទី១ កើតឡើងដោយការតែងតាំង និងមានអាណត្តិ ៥ឆ្នាំ។ សមាជិកចំនួន ៦១រូប ត្រូវបានជ្រើសរើសពីក្នុងចំណោមឥស្សរជនជាន់ខ្ពស់ នៃគណបក្សនយោបាយដែលមានអាសនៈនៅក្នុងរដ្ឋសភា នីតិកាលទី២៕

ប្រភព៖ រស្មីកម្ពុជា ប្រែសម្រួល៖ វាសនា