លោក Duterte ចាប់ផ្ដើមលើកសរសើរពីសហរដ្ឋអាមេរិក
- 2017-09-29 02:46:35
- ចំនួនមតិ 0 | ចំនួនចែករំលែក 0
លោក Duterte ចាប់ផ្ដើមលើកសរសើរពីសហរដ្ឋអាមេរិក
ចន្លោះមិនឃើញ
ប្រធានាធិបតីហ្វីលីពីន លោក Rodrigo Duterte ដែលតែងតែប្រើវោហារសព្ទអសុរសវាយប្រហារសហរដ្ឋអាមេរិកនោះ បានលើកសរសើរពីសហរដ្ឋអាមេរិក ដោយហៅសហរដ្ឋអាមេរិកថា ជាសម្ព័ន្ធមិត្តសន្តិសុខដ៏សំខាន់របស់ខ្លួន កាលពីថ្ងៃទី២៨ ខែកញ្ញា ម្សិលមិញ។
ការលើកឡើងរបស់ប្រធានាធិបតីហ្វីលីពីនរូបនេះ បានធ្វើឡើងក្នុងពិធីខួប ១១៦ឆ្នាំ នៃសង្រ្គាមកងទ័ពហ្វីលីពីន-អាមេរិក ប្រឆាំងនឹងក្រុមបះបោរ។ លោក Duterte បញ្ជាក់ថា លោកត្រូវក្រសួងការបរទេសហ្វីលីពីន ផ្ដល់ការណែនាំឲ្យបន្ថយវោហារសព្ទវាយប្រហារចំពោះសហរដ្ឋអាមេរិក ជាពិសេសចំពោះមុខកងទ័ពអាមេរិក នៅក្នុងពិធីគម្រប់ខួបនេះ។
ក្នុងពិធីនោះ លោក Duterte បានលើកសរសើរសហរដ្ឋអាមេរិកថា "ពួកគេជាសម្ព័ន្ធមិត្តរបស់យើង ហើយពួកគេតែងតែជួយយើង។ សូម្បីតែសព្វថ្ងៃនេះ ពួកគេបានផ្ដល់សម្ភារៈយោធាឲ្យទាហានរបស់យើងនៅសមរភូមិនៅក្រុង Marawi ដើម្បីវាយប្រឆាំងនឹងក្រុមបះបោរ"។
សូមបញ្ជាក់ថា លោក Dutete ធ្លាប់ជេរអតីតប្រធានាធិបតីអាមេរិក អូបាម៉ា ថា "កូនមីសំផឹង" បន្ទាប់មកប្រធានាធិបតី អូបាម៉ា បានលុបចោលកិច្ចប្រជុំធ្វើភាគីជាមួយហ្វីលីពីន អំឡុងកិច្ចប្រជុំកំពូលអាស៊ាន នៅក្នុងប្រទេសឡាវ កាលពីឆ្នាំ២០១៦៕