រាជរដ្ឋាភិបាល មិនទាន់អនុញ្ញាតឲ្យបោះផ្សាយ ឬជួញដូររូបិយបណ្ណឌីជីថលនោះទេ
- 2018-01-16 23:20:16
- ចំនួនមតិ 0 | ចំនួនចែករំលែក 0
រាជរដ្ឋាភិបាល មិនទាន់អនុញ្ញាតឲ្យបោះផ្សាយ ឬជួញដូររូបិយបណ្ណឌីជីថលនោះទេ
ចន្លោះមិនឃើញ
រាជរដ្ឋាភិបាលកម្ពុជា តាមរយៈគណៈកម្មការមូលបត្រកម្ពុជា (គ.ម.ក) របស់ក្រសួងសេដ្ឋកិច្ច បានប្រកាសថា រហូតមកដល់ពេលនេះ គ.ម.ក មិនទាន់បានផ្តល់អាជ្ញាបណ្ណ ឬការអនុញ្ញាតដល់ក្រុមហ៊ុនណាមួយឲ្យធ្វើប្រតិបត្តិការបោះផ្សាយ ឬប្រតិបត្តិការជួញដូរពាក់ព័ន្ធនឹងរូបិយបណ្ណឌីជីថលនោះទេ។
ការប្រកាសនេះ បន្ទាប់ពី គ.ម.ក បានសង្កេតឃើញមាននូវការផ្សព្វផ្សាយយ៉ាងសកម្មតាមប្រព័ន្ធអ៊ិនធើណែត និងតាមប្រព័ន្ធផ្សព្វផ្សាយផ្សេងៗ នាពេលកន្លងមក អំពីការបោះផ្សាយ និងការជួញដូររូបិយបណ្ណឌីជីថល។ រូបិយបណ្ណឌីជីថល ជាប្រភេទឧបករណ៍ហិរញ្ញវត្ថុថ្មី មិនទាន់មានការសិក្សាច្បាស់លាស់ ដែលការជួញដូរ ឬការជាប់ពាក់ព័ន្ធ អាចមានហានិភ័យខ្ពស់ និងបង្កឲ្យមានការខាតបង់ប្រាក់ ឬទ្រព្យសម្បតិ្តផ្ទាល់ខ្លួនច្រើនជាយថាហេតុ។
ក្នុងន័យនេះ ដើម្បីជៀសវាងនូវហានិភ័យ ឬការខាតបង់ផ្សេងៗ គ.ម.ក បានអំពាវនាវឲ្យសាធារណជនទាំងអស់មានការប្រុងប្រយ័ត្នខ្ពស់លើការជាប់ពាក់ព័ន្ធ ឬប្រឡូកក្នុងការជួញដូររូបិយបណ្ណឌីជីថលទាំងនោះ។
គ.ម.ក ក៏បានលើកឡើងដែរថា ថ្មីៗនេះ គ.ម.ក ទើបបានចុះអនុស្សារណៈនៃការយោគយល់ស្តីពីកិច្ចសហប្រតិបត្តិការលើហ្វីនថិចជាមួយក្រុមហ៊ុន Camnext Global Ltd ក្នុងគោលបំណងសិក្សាស្រាវជ្រាវលើយន្តការ ប្រភេទឧបករណ៍ហិរញ្ញវត្ថុឌីជីថល និងឧបករណ៍ផ្សេងៗ ដែលប្រើប្រាស់ជាមធ្យោបាយក្នុងការប្រមូលសាច់ប្រាក់ ឬមូលនិធិពីសាធារណជន និង/ឬប្រើប្រាស់ជាកម្មវត្ថុនៃការជួញដូរ ព្រមទាំងសិក្សាលើហានិភ័យពាក់ព័ន្ធឲ្យបានច្បាស់លាស់ជាមុនសិន មុនឈានដល់ការរៀបចំបទប្បញ្ញត្តិគ្រប់គ្រងឧបករណ៍ហិរញ្ញវត្ថុឌីជីថលថ្មីៗទាំងនោះ ដើម្បីជាផលប្រយោជន៍ និងទំនុកចិត្តសម្រាប់អ្នកចូលរួមក្នុងទីផ្សារ៕