រកឃើញស្ករត្នោតជិត៤០តោន លាយសារធាតុគីមីនៅសិប្បកម្មមួយក្នុងខណ្ឌច្បារអំពៅ

2018-01-17 12:08:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សមត្ថកិច្ចនគរបាលប្រឆាំងបទល្មើសសេដ្ឋកិច្ចបានរកឃើញស្ករត្នោតជិត ៤០តោន ដែលមានលាយសារធាតុហ្វូនិច (ដែលរក្សាទុកបានយូរនិងពណ៌ស) នៅក្នុងសិប្បកម្មកែឆ្នៃស្ករត្នោតមួយកន្លែងស្ថិតនៅផ្ទះលេខ២១៣ និងផ្ទះលេខ២១៩ ផ្លូវ៣៦៩ ភូមិម៉ាក់គ្លឿ សង្កាត់ច្បារអំពៅ១ ខណ្ឌច្បារអំពៅ កាលពីព្រឹកថ្ងៃទី១៧ ខែមករា ឆ្នាំ២០១៨។

សមត្ថកិច្ចចុះឆែកឆេរ សិប្បកម្មកែច្នៃស្ករត្នោត

លោក គង់ វុទ្ធី អនុប្រធានសាខាកាំកុងត្រូលផែស្ងួតចុងទីភ្នំពេញ បានបញ្ជាក់ថា ការចុះប្រតិបត្តិការត្រួតពិនិត្យសិប្បកម្មកែច្នៃស្ករត្នោតនេះ ធ្វើឡើងដោយសង្ស័យថា សិប្បកម្មនេះបានធ្វើឡើងដោយគ្មានច្បាប់អនុញ្ញាត និងលួចលាយនូវសារធាតុគីមីជាដើម។ សិប្បកម្មខាងលើពុំមានច្បាប់អនុញ្ញាត និងធ្វើការកែច្នៃស្ករត្នោតពុំអនុលោមតាមបទដ្ឋានច្បាប់ឡើយ។

តាមរបាយការណ៍បានបង្ហាញថា សមត្ថកិច្ចបានរកឃើញវត្ថុតាងពាក់ព័ន្ធរួមមាន៖ សំបកបាវ ចំនួន ១៤៥បាវ ថង់ច្រកស្កររាវចំនួន ៣០ថង់ ស្ករស ចំនួន ៥៣បាវ ស្មើ ២៦៥០គ.ក្រ ស្ករត្នោតកែច្នៃរួចនិងមិនទាន់កែច្នៃប្រមាណ ៣៨តោន វិក័យបត្រ ចំនួន ៧៦សន្លឹក។ ចំពោះវត្ថុតាងទាំងអស់នេះ ព្រះរាជអាជ្ញារងបានសម្រេចឲ្យបិទផ្លុំបេរក្សាដាក់ទុកក្នុងអាសយដ្ឋានខាងលើ និងសម្រេចមិនឲ្យបើកធ្វើអាជីវកម្មបន្ត ហើយបានអញ្ជើញម្ចាស់ទីតាំងមកនាយកដ្ឋាន ដើម្បីបន្តនីតិវិធី។

ការចុះបង្ក្រាបនេះ មានការចូលរួមពីកម្លាំងចម្រុះមកពីនាយកដ្ឋាននគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ មន្រ្តីកាំកុងត្រូល នៃក្រសួងពាណិជ្ជកម្ម និងមន្រ្តីមកពីក្រសួងសុខាភិបាល៕

អត្ថបទ៖ សោភា