កិច្ចព្រមព្រៀងពាណិជ្ជកម្មឆ្លងទ្វីបថ្មីមួយ លេចរូបរាងដោយគ្មានវត្តមានអាមេរិក

2018-03-09 07:11:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសចំនួន ១១ បានសម្រេចចុះហត្ថលេខាលើកិច្ចព្រមព្រៀងពាណិជ្ជកម្មថ្មីមួយ ដែលត្រូវបានស្គាល់ថាជាកិច្ចព្រមព្រៀងដៃគូពាណិជ្ជកម្មឆ្លងមហាសមុទ្រប៉ាស៊ីហ្វិក (TPP) ថ្មី នៅទីក្រុង Santiago ប្រទេសស៊ីលី កាលពីថ្ងៃ ព្រហស្បតិ៍ ទី៨ មីនាម្សិលមិញ បើទោះបីជាអវត្តមានសហរដ្ឋអាមេរិកក៏ដោយ។

កិច្ចព្រមព្រៀងពាណិជ្ជកម្មនេះ មានឈ្មោះជាផ្លូវការថា កិច្ចព្រមព្រៀងដៃគូពេញលេញ និងជឿនលឿនឆ្លងមហាសមុទ្រប៉ាស៊ីហ្វិក (CPTPP)។

ប្រទេសហត្ថលេខីចំនួន ១១ នៃកិច្ចព្រមព្រៀងនេះ មានដូចជា អូស្ត្រាលី កាណាដា ស៊ីលី ជប៉ុន ម៉ាឡេស៊ី ម៉ិកស៊ីកូ នូវែលហ្សេឡង់ ប៉េរូ និងប្រទេសអាស៊ានចំនួន ៣ គឺ ប្រ៊ុយណេ វៀតណាម និងសិង្ហបុរី ។

ប្រទេសទាំង ១១ រូមគ្នានេះ មានទំហំសេដ្ឋកិច្ចប្រមាណជាង ១៣,៥ ភាគរយ នៃសេដ្ឋកិច្ចសកលលោក និងមានទំហំទីផ្សារប្រជាជនចំនួន ៥០០ លាននាក់ ពោលគឺច្រើនជាងទំហំទីផ្សារប្រជាជនសហភាពអឺរ៉ុប។

សូមជម្រាបថា កិច្ចព្រមព្រៀងពាណិជ្ជកម្មនេះ លេចរូបរាងឡើងចំពេលដែលលោកត្រាំបានបញ្ឆេះសង្គ្រាមពាណិជ្ជកម្មពិភពលោក ជុំវិញការដំឡើងពន្ធនាំចូលដែកថែប និងអាលុយមីញ៉ូមក្នុងសប្ដាហ៍នេះ៕

ប្រភព៖ Channelnewsasia ប្រែសម្រួល៖ អឹុម ម៉េងស៊ាង