ក្រុមហ៊ុនចិន ដាក់ទុន ២០លានដុល្លារ ដាំឈើធ្នង់យកខ្លឹម នៅកម្ពុជា

2018-03-20 12:52:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វិនិយោគិនចិន បានបណ្តាក់ទុនប្រមាណ ២០លានដុល្លារអាមេរិក ដើម្បីដាំឈើធ្នង់ ដែលជាប្រភេទឈើមានតម្លៃខ្ពស់ ចំនួន ៥០០ហិកតា នៅខេត្តពោធិសាត់។

នៅក្នុងពិធីសម្ពោធជាផ្លូវការក្រុមហ៊ុន Harmony Shield International Group ប្រចាំកម្ពុជា នាព្រឹកថ្ងៃទី២០ ខែមីនា ឆ្នាំ២០១៨ នៅមហោស្រពកោះពេជ្រ រាជធានីភ្នំពេញ លោកលី មីងយ៉ាង នាយករងក្រុមហ៊ុន Harmony Shield ប្រចាំកម្ពុជា បានឲ្យដឹងថា ក្រុមហ៊ុននឹងដាំឈើធ្នង់ លើដី ៥០០ហិកតា ប៉ុន្តែដំណាក់កាលដំបូង គឺដាំចំនួន ២០០ហិកតាសិន។

ឈើធ្នង់ (រូបភាព៖ RFA)

លោកបានបន្តថា តាមធម្មតាឈើធ្នង់ក្នុងរយៈពេលជាង៣០ឆ្នាំ ទើបប្រមូលផលបាន តែខាងក្រុមហ៊ុនមានអ្នកជំនាញ និងបច្ចេកទេស ពិសេសខាងបង្កាត់ពូជឈើ ដោយដាំតែក្នុងរយៈពេល១០ទៅ១៥ឆ្នាំ នឹងទទួលបានផល។ លោកបញ្ជាក់ថា នៅពេលប្រមូលផលបាន ក្រុមហ៊ុននឹងនាំចេញទៅក្រៅប្រទេស។

លោក លី មីងយ៉ាង បានឲ្យដឹងទៀតថា នៅទីផ្សារប្រទេសចិន ខ្លឹមធ្នង់១តោន មានតម្លៃ១លានដុល្លារអាមេរិក ដែលខ្លឹមនេះគេយកទៅធ្វើអង្កាំ និងគ្រឿងលំអមានតម្លៃផ្សេងៗ។

សូមបញ្ជាក់ផងដែរថា ក្រុមហ៊ុន Harmony Shield Group មានបុត្រសម្ព័ន្ធនៅ១១ប្រទេស ដែលមានដូចជា ស្វីស ជប៉ុន ចិន អាមេរិក និងនៅតំបន់អាហ្វ្រិក៕