ពលរដ្ឋរស់នៅតាមបណ្តោយអតីតផ្លូវរថភ្លើងក្នុងខណ្ឌឫស្សីកែវ សុំអន្តរាគមន៍ពីរដ្ឋាភិបាល

2018-03-21 06:19:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រជាពលរដ្ឋជាច្រើននាក់ តំណាងឲ្យប្រជាពលរដ្ឋ ១២៧០គ្រួសារ ដែលរស់នៅតាមបណ្តោយអតីតផ្លូវរថភ្លើង ចាប់ពីផ្លូវបំបែកផ្លូវជាតិលេខ៥ ឆ្ពោះទៅផ្លូវលេខ៧០ បាននាំគ្នាមកដាក់ញ្ញត្តិសុំអន្តរាគមន៍នៅសាលារាជធានីភ្នំពេញ ខុទ្ទកាល័យនាយករដ្ឋមន្ត្រី និងក្រសួងដែនដីនគរូបនីយកម្ម និងសំណង់ នៅព្រឹកថ្ងៃទី២១ ខែមីនានេះ ឲ្យជួយអន្តរាគមន៍លើគម្រោងអភិវឌ្ឍន៍ផ្លូវបេតុង ដោយស្នើសុំកាត់ត្រឹមតែ១០ម៉ែត្រ (សាលារាជធានីភ្នំពេញកាត់យកដីចំណីផ្លូវម្ខាង៣០ម៉ែត្រ)។ គម្រោងផ្លូវបេតុងនេះ មានប្រវែង ជាង ៤,៦គីឡូម៉ែត្រ ស្ថិតនៅក្នុង៣សង្កាត់ គឺសង្កាត់គីឡូម៉ែត្រលេខ៦ សង្កាត់ឫស្សីកែវ និងសង្កាត់ទួលសង្កែទី១។

នៅក្នុងការតវ៉ានេះ ប្រជាពលរដ្ឋបានលើកបដា បង្ហាញពីការប្រឆាំងដាច់ខាតចំពោះគោលការណ៍របស់សាលារាជធានីភ្នំពេញ ក្នុងការអភិវឌ្ឍនៅហ្នឹងកន្លែង ពីព្រោះពួកគាត់រស់នៅលើដីនោះជាង ៣០ឆ្នាំមកហើយ និងសុំផ្តល់បណ្ណកម្មសិទ្ធិ និងស្នើសុំកុំឲ្យយកអ្នកផ្សេងមករស់នៅលើដីរបស់ពួកគាត់នោះឡើយ។

ប្រជាពលរដ្ឋបានបញ្ជាក់ថា ពួកគាត់មិនយល់ព្រមតាមចំណាត់ការរបស់សាលាខណ្ឌឫស្សីកែវ ក្នុងការកាត់ដីរបស់ពួកគាត់ ៣០ម៉ែត្រម្ខាងពីអ័ក្ស យកមកអភិវឌ្ឍផ្លូវប៉េតុង ១៥ម៉ែត្រម្ខាង ហើយសល់ ១៥ម៉ែត្រទៀត មកពុះចែកគ្នា។

ញ្ញត្តិរបស់ប្រជាពលរដ្ឋត្រូវបានសាលារាជធានីភ្នំពេញ ខុទ្ទកាល័យនាយករដ្ឋមន្ត្រី និងក្រសួងដែនដីនគរូបនីយកម្ម និងសំណង់ ទទួលយកដើម្បីដាក់ជូនថ្នាក់លើពិនិត្យ និងសម្រេច៕

អត្ថបទ៖ សោភា