អាមេរិកបញ្ជូនទ័ពទៅហាត់នៅអូស្ដ្រាលី ដើម្បីទប់ទល់ឥទ្ធិពលរបស់ចិន
- 2018-03-23 09:23:54
- ចំនួនមតិ 0 | ចំនួនចែករំលែក 0
អាមេរិកបញ្ជូនទ័ពទៅហាត់នៅអូស្ដ្រាលី ដើម្បីទប់ទល់ឥទ្ធិពលរបស់ចិន
ចន្លោះមិនឃើញ
សហរដ្ឋអាមេរិក នឹងបញ្ជូនកងទ័ពម៉ារីន ទៅហ្វឹកហាត់នៅអូស្ដ្រាលី រយៈពេល ៦ខែ ដើម្បីត្រៀមប្រឆាំងនឹងអ្វីដែលអាមេរិកចាត់ទុកថាជាការឈ្លានពានរបស់ចិននៅក្នុងតំបន់។ រដ្ឋមន្ដ្រីក្រសួងការពារជាតិអូស្ដ្រាលី បានបញ្ជាក់នៅថ្ងៃទី២៣ ខែមីនានេះថា ទ័ពម៉ារីនអាមេរិកដែលត្រូវបញ្ជូនមកហ្វឹកហាត់នៅអូស្រ្ដាលី គឺមានចំនួន ១៥៨៧នាក់ កើនឡើងជិត ២៧ភាគរយ បើប្រៀបធៀបកាលពីឆ្នាំ២០១៧។ កម្មវិធីនៃការហ្វឹកហាត់នេះ មានឈ្មោះថា “Force Posture Initiatives”។
លោកស្រីរដ្ឋមន្ដ្រី Marise Payne បាននិយាយក្នុងសេចក្ដីថ្លែងការណ៍ថា កងទ័ពអាមេរិក ពិតជាដើរតួនាទីយ៉ាងសំខាន់ក្នុងការធានាសន្ដិសុខ និងស្ថិរភាពនៅទូទាំងតំបន់ឥណ្ឌូចិន-ប៉ាស៊ីហ្វិក ហើយកម្មវិធីហ្វឹកហាត់ Force Posture Initiatives នឹងក្លាយជាផ្នែកមួយដ៏សំខាន់ក្នុងការរក្សាស្ថិរភាព និងសន្ដិសុខក្នុងរយៈពេលប៉ុន្មានទសវត្សខាងមុខ។
ការបញ្ជូនទ័ពអាមេរិក ទៅអូស្ដ្រាលី បានចាប់ផ្ដើមដំបូង ក្នុងឆ្នាំ២០១១ ជាផ្នែកមួយនៃការបង្វែរគោលនយោបាយអាមេរិក ទៅតំបន់អាស៊ី។ ស្ថិតក្រោមការដឹកនាំរបស់លោកដូណាល់ ត្រាំបច្ចុប្បន្ន អាមេរិកមានគោលបំណងប្រឆាំងឥទ្ធិពលចិន នៅក្នុងតំបន់ដែលមានភាពតានតឹងជុំវិញជម្លោះនៅសមុទ្រចិនខាងត្បូង។
ចិនបានកាន់កាប់ស្ទើរទាំងស្រុង នៅដែនសមុទ្រចិនខាងត្បូង ដែលជាផ្លូវធ្វើពាណិជ្ជកម្មដ៏ធំ និងសម្បូរណ៍ដោយធនធានធម្មជាតិដូចជាប្រេង និងឧស្ម័នជាដើម។ ដោយឡែកកម្មវិធីហ្វឹកហាត់ដែលទំនងធ្វើឲ្យចិនប្រតិកម្មនេះ កងទ័ពអាមេរិកនឹងហ្វឹកហាត់ជាមួយកងទ័ពអូស្ដ្រាលី ឥណ្ឌូនេស៊ី ជប៉ុន ម៉ាឡេស៊ី ហ្វីលីពីន សិង្ហបុរី និងថៃ។ ការដាក់ពង្រាយយោធានេះ ក៏អាចគំរាមកំហែងនិងធ្វើឲ្យទំនាក់ទំនងអូស្ដ្រាលី-ចិន ឲ្យកាន់តែចុះខ្សោយជាងមុនផងដែរ៕
---> Sabay ត្រូវការរើស Marketing Consultant។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/j3UhbY